«Հուլիսի առաջին տասնօրյակին մեր երկիրը գտնվում էր հյուսիս-արևմուտքից ներթափանցող խոնավ և ցուրտ օդային հոսանքների ազդեցության գոտում, ինչի արդյունքում հուլիսի առաջին տասնօրկայում հանրապետության ողջ տարածքում օդի ջերմաստիճանը նորմայից ցածր էր 2-4 աստիճանով։ Խոնավ օդային հոսանքների ներթափանցմամբ պայմանավորված, հանրապետության տարածքում ժամանակ առ ժամանակ դիտվում էին ամպրոպային բնույթի անձրևներ»։ Այս մասին այսօր՝ օգոստոսի 4–ին կայացած ասուլիսի ժամանակ ասաց Հիդրոօդերևութաբանության և մոնիտորինգի կենտրոնի տնօրենի տեղակալ Գագիկ Սուրենյանը։

«Հուլիսի 12-ից սկսած հյուսիս–արևմտյան սառը հոսանքներն ընդհատվեցին՝ իրենց տեղը զիջելով հարավից՝ հիմնականում Իրաքից եկող արևադարձային տաք օդային հոսանքներին։ Հուլիսի 12-ից մինչև օրս մեր երկիրը գրեթե անդադար գտնվել է այդ արևադարձային տաք հոսանքների ազդեցության գոտում։ 

Հուլիսի 12-31–ը ընկած ժամանակահատվածում Արարտյան դաշտում, Սյունիքի հովտային գոտում և Երևանում օդի ջերմաստիճանը հիմնականում տատանվել է 37-39 աստիճանի սահմաններում, իսկ հուլիսի 30-ին այն հասավ իր պիկին՝ Արարատյան դաշտում ջերմաստիճանը հասավ 40 աստիճանի»,–նշեց Սուրենյանը։ 

Գագիկ Սուրենյանի խոսքով, տեղումների քանակը հանրապետության տարածքում հուլիսին բաշխվել է խիստ անհավասարաչափ։ Հիմնականում հյուսիսային շրջաններում՝ Տավուշում, Լոռիում Սյունիքում թափվել է տեղումների ամսական քանակի 100-170 տոկոսը։ 

«Բայց նաև ունենք հատվածներ, օրինակ Արարատի հատվածը, որտեղ տեղումների քանանակը կազմել է ամսական նորմայի ընդամնեը 4 տոկոսը, իսկ Մեղրիի հատվածում ընդհանրապես տեղումներ չեն եղել։ Երևանում նույնպես խիստ անհավասարաչափ են եղել տեղումներ. որոշ հատվածներում տեղումների քանակը կազմել է ամսական նորմայի 180 տոկոսը, որոշ հատվածներում էլ՝ ընդամենը 35 տոկոսը։ 

Տաք օդի ալիքի պիկը դիտվեց օգոստոսի 2-ին, երբ Երևանում ջերմաստճանը հասավ մինչև +41.9 աստիճան՝ գերազանցելով տվյալ օրվա՝ 2000 թվականին դիտված 40,8 աստիճանը։ Իսկ Արենիի հատվածում այդ օրը գրանցվեց մինչև 42.6 աստիճան տաքություն»,–հավելեց Սուրենյանը։ 

Գագիկ Սուրենյանի խոսքով, այդ տաք օդի ալիքի դեպքում պատմական առավելագույն ջերմաստիճանները դեռևս չեն գերազանցվել։ Հանրապետության պատմական առավելագույնը դիտարկվել է 2011 թվականի հուլիսի 31-ին Մեղրիի հատվածում՝ 43.7 աստիճան, իսկ Երևանում՝ 2018 թվականի հուլիսի 12-ին՝ 42.4 աստիճան։