ՀՀ քննչական կոմիտեի Արմավիրի մարզային քննչական վարչության Վաղարշապատի քննչական բաժնում փաստաթղթեր են ստացվել ՀՀ ՆԳՆ Ոստիկանության համայնքային ոստիկանության գլխավոր վարչության Վաղարշապատի բաժնից։ Ինչպես հայտնում է Shamshyan.com-ը, նշված փաստաթղթերը կազմվել են փետրվարի 24-ին Փարաքար խոշորացված համայնքի համայնքապետարանի հարակից տարածքում տեղի ունեցած ֆիզիկական ներգործության փաստով։
ՆԳՆ Ոստիկանության քրեական ոստիկանության գլխավոր վարչության Արմավիրի մարզային քրեական վարչությունում օպերատիվ տեղեկություններ էին ստացվել, որ փետրվարի 24-ին Փարաքարի համայնքապետարանի շենքում, ապա՝ դրսում, վիճաբանություն է տեղի ունեցել համայնքապետարանի աշխատակիցների և քաղաքացու միջև։
Տեղում պարզվել է, որ միջադեպին մասնակցություն են ունեցել Փարաքար գյուղի բնակիչ 34-ամյա Էրիկ Ասատրյանը, Թաիրով գյուղի բնակիչ 36-ամյա Հրաչյա Շառոյանը և Փարաքար գյուղի բնակիչ 35-ամյա Արամ Սուքիասյանը։
Վերջիններս կենցաղային հարցի շուրջ վիճաբանել են Փարաքար գյուղի բնակիչ 39-ամյա Էդգար Հովակիմյանի հետ, որի ընթացքում էլ, ըստ օպերատիվ տեղեկությունների, ծեծի են ենթարկել վերջինիս։
Կասկածյալներից Է. Ասատրյանն աշխատում է Փարաքարի համայնքապետարանի աշխատակազմի քաղաքաշինության, հողաշինության, գյուղատնտեսության և բնապահպանության բաժնի առաջատար մասնագետ, Ա. Սուքիասյանն աշխատում է Փարաքարի համայնքապետարանի «Բարեկարգում» տնօրինության տեղակալ-ինժեներ, իսկ Հ. Շառոյանը Փարաքարի համայնքապետարանի «Բարեկարգում» տնօրինության տնօրեն։
Դեպքի փաստով Վաղարշապատի քննչական բաժնում նախաձեռնվել է քրեական վարույթ։
Հայոց պատմության` Արցախին վերաբերող հատվածը փորձ է արվում վերախմբագրել, ձևախեղել՝ շրջանառությունից հանելով նաև տեղանվան հայկական ձևը։ Sputnik Արմենիայի հետ զրույցում նման կարծիք հայտնեց պատմական գիտությունների թեկնածու Արման Մալոյանը։
Արման Մալոյան
© Sputnik / Aram Nersesyan
Նշեց՝ չի կարող ասել, թե քաղաքականությունն անսպասելի էր. ազգայինից հեռանալու, այն համաշխարհայինին ստորադասելու տենդենցները վաղուց են նկատվում, և ազգայինից հրաժարվելու մարմաջը Հայաստանում դարձել է պետական քաղաքականությանը համաքայլ ուղեկցող մի բան։
«Բարբարոսաբար վարվեցին հատկապես «Հայոց պատմության» դպրոցական ծրագրերի հետ․ նախ այն անվանափոխվեց, դարձավ «Հայաստանի պատմություն», հետո էլ սկսվեցին առանձին ձևակերպումներից մոլուցքով ազատվելու կամ դրանք վերաձևակերպելու ձգտումներ։ Մանավանդ, եթե դրանք ձևակերպված էին հայրենասիրական մղումով կամ որոշակի տարրեր էին պարունակում։ Օրինակ, ամեն կերպ փորձում են ազատվել «Արցախ» տեղանվան հայկական ձևով հիշատակումից՝ նախապատվություն տալով Լեռնային Ղարաբաղ կամ Ղարաբաղ ձևակերպմանը»,- նշեց Մալոյանը։
Համեմատության համար նա առաջարկում է դիտարկել ադրբեջանական տարբեր կայքերը․ դրանցում հայկական բնակավայրերը նշվում են ադրբեջանական տարբերակներով։ Փոխարենը մենք էլ շարունակենք պրոպագանդել, հանրահռչակել ու տարածել մեր ազգայինը, գրչի մի հարվածով փորձում ենք առաջ մղել «Ղարաբաղ» ձևը։
Պատմաբանի խոսքով՝ «Արցախ» ձևակերպումից ամեն կերպ հրաժարվելու տենդենցը նկատվեց նաև «Հայոց պատմության» 11-րդ դասարանի դասագրքում կատարված փոփոխություններով, որից հանվել են Արցախյան ազատամարտը և Արցախի հարցը։
«ԿԳՄՍՆ-ն փորձեց հիմնավորել, թե Արցախյան ազատագրական պատերազմի, Արցախյան հիմնախնդրի, անկախության գործընթացի և այլ հարցերին անդրադառնում կամ ուսումնասիրում են 9-րդ դասարանում, բայց նախարարության ներկայացուցիչը մոռացավ, որ դա նախկին դասագրքերում և նախկին ծրագրերում էր, մինչդեռ արդեն սեպտեմբերից դրանք դուրս են բերվելու դպրոցներից և մտնելու են նրանց բարբարոս ձեռագրով առաջնորդված մասնագետի փոփոխած դասագրքերը։ 9-րդ դասարանի դասագրքում կատարվել է նույն զտման, մաքրման գործունեություն»,- նշում է պատմաբանը։
Նա օրինակներ է ներկայացնում, թե 9-րդ դասարանի հին դասագրքի մի շարք թեմաներ նոր դասագրքում ինչպես են փոփոխվել, ձևախեղվել «ազգադավ պատմաբանների ձեռքով»։
Հին ծրագրի 4-րդ թեմայի վերնագիրն է «Արցախյան ազատամարտը», նորում այն չկա էլ։ Առաջին ենթահարցը՝ «Արցախյան ազատամարտը 1990-94թթ», նոր ծրագրով դարձել է «Լեռնային Ղարաբաղի հիմնախնդիր»։ Երկրորդ ենթահարցը՝ «Արցախյան հիմնախնդիրը միջազգային ատյաններում, հիմնադրի լուծման հեռանկարները», նորում՝ «Լեռնային Ղարաբաղի հասարակական-քաղաքական, սոցիալ-տնտեսական կյանքը», երրորդ ենթահարցն է՝ «Արցախյան ազատամարտի արդի փուլը», նորում այն դարձել է «Մշակույթը Լեռնային Ղարաբաղում»։ «Արցախյան ազատամարտի հերոսները» չորրորդ ենթահարցն է, որը, պատմաբանի խոսքով, առհասարակ ջնջված, հանված է։ Դրա փոխարեն առաջարկվում է ուսումնասիրել «Հասարակության առօրյա կյանքն ու կենցաղը»։
«Այսինքն՝ սա ավելի կարևոր է, քան սովորողը ճանաչի Արցախյան ազատամարտի հերոսներին, նրանց գործունեությունը»,- նշում է պատմաբանը։
Հավելում է՝ Արցախը դուրս է գալիս մեր պատմությունից, մատաղ սերնդի գիտակցությունից, դասագրքերից աստիճանաբար հանվում է, լվացվում է Արցախի՝ Հայաստանի մաս լինելու գաղափարը, մեր իրավունքներն Արցախի նկատմամբ, սերմանվում խաղաղության դարաշրջանը կեղծ, անիրական, խախուտ հիմքերի վրա։
Արման Մալոյանի խոսքով՝ Հայոց ցեղասպանության հարցի լուրջ վերանայումներ առայժմ նոր դասագրքերում չկան, նախորդ ծրագրի հիմնական թեմատիկան պահպանվել է։ Բայց մեկ այլ տենդենց էլ է նկատվում՝ եթե ապազգայնացման մի սլաքն ուղղված է Արցախի հայկականության մոռացությանը նպաստելուն, ապա մյուսը դեպի ազգային կյանքում կարևորություն ունեցող մեկ այլ հաստատություն է՝ Հայ առաքելական եկեղեցի։
Օրինակ, նրա խոսքով, 9–րդ դասարանի դասագրքից հանվել է «Հայոց ցեղասպանությունն ու հայ եկեղեցին, հայոց ցեղասպանության նահատակների սրբադասումը» թեման։
Մալոյանը վստահ է, որ կեղծ և հորինված թեզերով հասարակությանը երկար կերակրել չի ստացվի, քանի որ պատմությունը գրվում ու պահպանվում է նաև ականատեսների հիշողություններով, փաստավավերագրական նյութերի հիման վրա։
Պատմաբանը նաև ցավ է ապրում, որ այս իրավիճակում մեծ թվով մասնագետներ լուռ և կրավորական կեցվածքով հետևում են, թե ինչպես է պատմությունը ձևախեղվում։ Շեշտում է՝ ժամանակն է, որ հայ ուսուցիչը մի կողմ դնի մտավախությունները աշխատանքից ազատվելու, այլ ճնշումների ենթարկվելու, բարձրաձայնի իր կարծիքն ու տեսակետը՝ թույլ չտալով մոռացության տալ ազգային նպատակներն ու իղձերը, որոնք դարեդար եղել են հայեցի դաստիարակության ու կրթության հիմքում։
ՀՀ բանկերում այսօր՝ փետրվարի 28-ին ժամը 09։00-ի դրությամբ, ԱՄՆ դոլարի առքի միջին փոխարժեքը կազմում է 390.61 դրամ՝ նախորդ օրվա վերջի համեմատ աճելով 0.25 դրամով։
Ըստ Rate.am կայքի՝ դոլարի վաճառքի միջին գինը՝ 395.91 դրամ է:
Փոխանակման կետերում դոլարի առքը 392 դրամ է, վաճառքը՝ 396։
Եվրոյի առքի միջին փոխարժեքը կազմում է 404.72 դրամ, իսկ վաճառքի դեպքում միջին գինը` 416.88։
Փոխանակման կետերում եվրոյի առքը 410 դրամ է, վաճառքը՝ 415։
Ռուբլու առքն էլ կազմում է 4.38 դրամ, վաճառքի դեպքում միջին գինը՝ 4.70 է։
Փոխանակման կետերում ռուբլին գնվում է 4.40 և վաճառվում 4.50 դրամով։
Հանրապետությունում այսօր ժամը 9–ի դրությամբ բոլոր տրանսպորտային միջոցների համար փակ է միայն Թթուջուր–Նավուր ճանապարհը։ Տեղեկությունը հայտնում է «Ճանապարհային դեպարտամենտ» հիմնադրամը։
«Վարդենյաց լեռնանցքը փակ է կցորդիչով տրանսպորտային միջոցների համար։ Աշոցքի, Ամասիայի, Գավառի, Տաշիրի, Արագածի, Սիսիանի, Գորիսի, Վարդենիսի տարածաշրջանների և Մարտունի-Վարդենիս ճանապարհներին տեղ-տեղ մերկասառույց է»,– ասված է հաղորդագրությունում։
Միջպետական և հանրապետական նշանակության մյուս ճանապարհները բաց են։
Ճանապարհաշինարարներն ավտոճանապարհներին իրականացնում են մաքրման և աղ-ավազով մշակման աշխատանքներ:
ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը Իրանի Իսլամական Հանրապետությունում ՀՀ արտակարգ և լիազոր դեսպան Գրիգոր Հակոբյանի հետ Թեհրանում հանդիպել են ԻԻՀ ճանապարհների և քաղաքաշինության նախարար Ֆարզանեհ Սադեղի և նախարարի տեղակալ Ռեզա Ակբարիի հետ: Այս մասին հայտնում են ՏԿԵՆ-ից։
Կողմերը ողջունել են երկու երկրների միջև համագործակցությունը տրանսպորտի ոլորտում: Հանդիպումների ընթացքում քննարկվել են երկու երկրներում բեռնատարներից գանձվող ճանապարհային հարկերը փոխադարձ նվազեցնելու և/կամ չեղարկելու հարցերը:
Կողմերը համաձայնել են մասնագիտական խմբերի հանդիպում կազմակերպել առաջիկայում` քննարկելու գանձվող ճանապարհային հարկերի երկուստեք արտոնությունների տրամադրման հնարավոր տարբերակները:
Քննարկվել են նաև ավտոմոբիլային բեռնափոխադրումների թվայնացման, մասնավորապես` e-CMR բեռնագրերի կիրառման հետ կապված հարցեր:
Պայմանավորվածություն է ձեռք բերվել խորացնել հարաբերությունները բեռնափոխադրումների թվայնացման ոլորտում:
ՀՀ վարչապետ Նիկոլ Փաշինյանի մամուլի քարտուղար Նազելի Բաղդասարյանի տունը թալանողները նրան մոտ 50 հազար ԱՄՆ դոլարի վնաս են պատճառել։ Տեղեկությունը հայտնում է «Ժողովուրդ» օրաթերթը։
Նշենք` փետրվարի 25-ին հայտնի դարձավ, որ ՀՀ վարչապետի մամուլի քարտուղար Նազելի Բաղդասարյանի տունը թալանել են: Ըստ տեղեկությունների` փետրվարի 25-ի գիշերը ՀՀ ՆԳՆ ոստիկանության քրեական ոստիկանության գլխավոր վարչությունը և Երևանի քրեական վարչությունը մի խումբ անձանց է վնասազերծել, որոնք կասկածվում են ինչպես Երևանում, այնպես էլ մարզերում պաշտոնատար անձանց տները թալանելու մեջ: Նշվում էր նաև, որ Բաղդասարյանի տան գողությունից անմիջապես հետո Փաշինյանն անձամբ է ՀՀ ոստիկանապետ Արամ Հովհաննիսյանին և ՆԳ նախարար Արփինե Սարգսյանին հրահանգ տվել գործուն քայլեր անել բնակարանային գողությունները բացահայտելու համար։
«Գողերը նրա տուն են մտել անխոչընդոտ` հարմարեցված բանալիով տան դուռը բացելով: Ինքը` Նազելի Բաղդասարյանը, հրաժարվում է «Ժողովուրդ» օրաթերթին կատարվածի մասին որևէ տեղեկություն կամ մեկնաբանություն տալ։ Բաղդասարյանի շրջապատի տեղեկություններով` նրա տնից գողացել են ոսկյա թանկարժեք զարդեր, ոսկեգույն մետաղյա զարդեր (կարծելով, թե ոսկի է), մեկ ժամացույց, թևնոց և այլ իրեր: Ընդհանուր նախնական հաշվարկով` գողերը պատճառել են մոտ 50 հազար ԱՄՆ դոլարի վնաս: Բայց այս հաշվարկը խիստ նախնական է, այն կարող է ավելանալ կամ պակասել»,– գրում է թերթը:
Հիշեցնենք` դեկտեմբերին էլ թալանել էին Նիկոլ Փաշինյանի աներորդու` Հրաչյա Հակոբյանի առանձնատունը։
Հոլիվուդի լեգենդար աստղ Ջին Հեքմենին եւ նրա կնոջը՝ Բեթսի Արակավային, մահացած են գտել Սանտա Ֆեի իրենց տանը, տեղեկացրել է Daily Mail-ը։
Զույգին մահացած են գտել իրենց շան հետ միասին։ Տեղի լրատվամիջոցները տեղեկացրել են, որ ոստիկանությունը չի կարծում, թե նրանց մահվան մեջ հանցակազմ կա։
Սանտա Ֆե օկրուգի շերիֆ Ադան Մենդոսան մահվան պատճառը չի նշել։
Զույգն ամուսնացել էր 1991թ.՝ 1990թ. Նյու Մեքսիկոյի իրենց տուն տեղափոխվելուց հետո: Տեղեկացվել է, որ նրանք սկսել են հանդիպել 80-ականների կեսերին Կալիֆոռնիայի մարզասրահում հանդիպելուց հետո։
Ավելի ուշ Հեքմենը նշել էր, որ իրենց հարաբերություններն սկսվել են առաջին կնոջից՝ Ֆեյ Մալթեզեից բաժանվելուց հետո, որի հետ նա ամուսնացած է եղել 1956-1986թթ.։
Զույգը պաշտում էր գերմանական հովվաշներին եւ մի պահ երեք շուն ուներ։
Նրանց կողքին սատկած են գտել նաեւ նրանց ներկայիս սիրելի շանը։
Թուրքիայի հետ սահմանը կարճաժամկետ բացելը Հայաստանի համար գլոբալ առումով ռիսկային է, ու երկրում մի քանի ճյուղ էական կտուժի։ Այս մասին լրագրողների հետ զրույցում ասաց Հայաստանի գործատուների հանրապետական միության նախագահ Գագիկ Մակարյանը` անդրադառնալով Թուրքիայի հետ սահմանի բացման հնարավոր ռիսկերին։
«Գլոբալ առումով սահմանի կարճաժամկետ բացելը Հայաստանի համար ռիսկային է, իսկ երկարաժամկետի դեպքում` դրանք կարող են նվազել, քանի որ հնարավոր է` նոր հանգամանքներ ի հայտ գան։ Թուրքիայի սահմանի բացման դեպքում ՀՀ–ում մի քանի ճյուղ էական կտուժի` շինարարական նյութերի արտադրությունը, շինարարությունը, գյուղատնտեսությունը, հյուրանոցային, անշարժ գույքի բիզնեսները»,– նշեց Մակարյանը։
Ընդգծեց` Արևմուտքն ուրախ կլինի, եթե Հայաստան–Թուրքիա սահմանը բացվի, բայց նրանք ուզում են Ռուսաստանի դերը տարածաշրջանում նվազեցնել, իսկ ՀՀ–ն այդ հարցում պետք է ճիշտ կշռադատի և չշտապի։
«Մի խնդիր էլ կա. Թուրքիան 1993 թվականին սահմանը միակողմանի փակել է Արցախի հակամարտության պատճառով, հիմա այդ հարցն օրակարգից հանված է։ Այդ դեպքում ինչո՞ւ է այն շարունակում փակ մնալ ու նախապայմաններ են առաջ քաշվում»,–ասաց նա։
Գործատուների հանրապետական միության նախագահը նշում է, որ Հայաստանը պետք է կարողանա ինքն իրեն գնահատել ու սահմանը բացելուն համաձայնի այն ժամանակ, երբ համապատասխան երաշխիքներ ունենա։
Անդրադառնալով Թուրքիայի հետ արտաքին առևտրին` փորձագետը շեշտեց, որ այն չնչին է. 2023 թվականին ներմուծվել է 336 մլն դոլարի ապրանք, արտահանվել է ընդամենը 6.4 մլն դոլար։
Ոչ պաշտոնական ցուցանիշները մի փոքր այլ են, երբ երրորդ երկրներով է ապրանք արտահանվում, այդ թիվը հասնում է 30 մլն դոլարի։
«Մեր էկոնոմիկան դեռ պատրաստ չէ էական արտահանման։ Երրորդ երկրներով Հայաստանից Թուրքիա արտահանվել է որոշակի պղինձ, մոլիբդեն, տպասալիկների համար տպագրական սարքեր, մի քիչ բանջարեղեն։ Թուրքիայից Հայաստան ամենաշատը ներմուծվել են մարքող միջոցներ, քիմիական նյութեր, պլաստմասսա, տեքստիլ, հագուստ, ոսկեղեն, շինարարական նյութեր և այլն։ Մենք, սրանից ելնելով, պետք է հաշվի առնենք, որ մի քանի ուղղությամբ Թուրքիան առաջին հնգյակի մեջ է` ցեմենտի արտադրություն, մեքենաշինություն, տեքստիլ, դեղագործություն և տուրիզմ»,– ասաց Մակարյանը։
Փորձագետի կարծիքով` հայ–թուրքական սահմանը բացելու մի քանի իմաստ կա` տարածաշրջանում խաղաղություն ստեղծել, Թուրքիայի գործոնն օգտագործվել` Ադրբեջանի վրա ազդելու համար, ընդառաջ գնալ Արևմուտքի հորդորներին և տարանցիկ բեռների առումով հետաքրքրություն ստեղծել։
40 տարեկանում սեքսի մեջ լավագույն բանը ազատությունն է, կարծում է Քեյթ Հադսոնը։
Bustle-ին տված հարցազրույցում 45-ամյա Հադսոնը նշել է. որ անամոթությունն այն հատկությունն է, որը ինքը համարում է ամենակարևորը ննջարանում։ «Սեքսը չպետք է գեղեցիկ լինի, և ես կարծում եմ, որ տարիքի հետ դուք ավելի շատ եք հաճույք ստանում դրանից»:
«Ես մոլորակի ամենամեծ ֆլիրտ անողն եմ։ Այնպես որ, կարծում եմ, որ ցանկացած մարդ, ով երբևէ եղել է ինձ հետ, շատ լավ գիտի, որ ես սիրախաղ եմ անում բոլորի հետ՝ աղջիկների, տղաների հետ: Փառք Աստծո, որ հանդիպեցի ճիշտ տղայի», - ասել է նա՝ նկատի ունենալով իր նշանած Դենի Ֆուջիկավիին: (Հադսոնը նաև որդի ունի՝ Ռայդերը, Քրիս Ռոբինսոնից և որդի Բինգհեմը Մեթ Բելամիից):
Նրա խոսքով՝ կյանքում կարևորը ընտանիքն է։ Հադսոնը շատ մտերիմ է մոր՝ Գոլդի Հոունի, խորթ հոր՝ Քուրթ Ռասելի և նրա քույրերի ու քույրերի, այդ թվում՝ եղբոր՝ Օլիվեր Հադսոնի հետ։ «Եղբայրներիցս մինչև զարմիկներ ու զարմուհիներ, քույրս, մայրիկս, հայրիկս, զուգընկերս, նրա եղբայրները: Ես կարծում եմ, որ այստեղից է գալիս իրական ինքնաբավ բնույթը»:
Օդի ջերմաստիճանը փետրվարի 26-27-ին և՛ գիշերը, և՛ ցերեկն աստիճանաբար կբարձրանա ևս 3-5 աստիճանով։ Հետո ավելի զգալի, հաղորդում է Հիդրոօդերևութաբանության և մոնիթորինգի կենտրոնը։
Հիշեցնենք, որ փետրվարի 20-23-ին Հայաստանի շրջանների զգալի մասում ձյուն տեղաց, ընդ որում` ամսի 20-ին և 21-ին առանձին շրջաններում և Երևանում՝ առատ։ Երևանում օդի ջերմաստիճանը ցերեկային ժամերին տատանվում էր +0–ից +2, իսկ գիշերը` -5-ից -7 աստիճանի սահմաններում։ Օդի ջերմաստիճանը ողջ հանրապետությունում նվազել էր 10-16 աստիճանով:
Մարտի 1-ին Երեւանում ջերմաստիճանը կլինի առավոտյան - 4, ցերեկը՝ + 2, երեկոյան՝ 0, գիշերը՝ - 4։
Մարտի 3-ին՝ առավոտյան + 2, ցերեկը + 10, երեկոյան + 5, գիշերը՝ – 3։
Իսկ մարտի 10-ին արդեն կունենանք շատ ջերմ գարնանային եղանակ՝ գիշերը + 6, ցերեկը + 13։
Ֆոտո
