Հարավային Կովկասի տարածաշրջանում ռազմաքաղաքական լարվածությունը ոչ մի տեղ չի գնացել։ Ավելին, այն ուժեղացել է, ինչպես նաեւ անորոշությունը՝ կապված տարբեր գործընթացների հետ։ Դրանք իրենց հերթին կապված են ղարաբաղյան հարցի, հայ-թուրքական հարաբերությունների կարգավորման, ինչպես նաեւ տարածաշրջանում իրենց ազդեցությունն ուժեղացնելու Թուրքիայի եւ Ադրբեջանի փորձերի հետ։ Այս մասին NEWS.am-ին տված հարցազրույցում հայտարարեց ռուս քաղաքագետ Անդրեյ Արեշեւը։
Շատ գործընթացներ, նրա գնահատմամբ, տատանողական վիճակում են, եւ 2022 թվականին դրանք այս կամ այն ուղղությամբ կշարունակվեն։
«Տարածաշրջանը կմնա բավական կոնֆլիկտային եւ բավական պայթյունավտանգ՝ չնայած այն միավորելու համար նախատեսված դիվանագիտական հարթակներ ձեւավորելու բոլոր փորձերին։ Հակասությունները բազմակի բնույթ են կրում՝ եւ՛ միջպետական, եւ՛ ներպետական»,- ասաց նա։
Փորձագետը նշեց, որ նույն Հայաստանում տարբեր խմբեր ուղիղ հակառակ տեսակետներ են արտահայտում Ղարաբաղի հարցում եւ հայ-թուրքական հարաբերությունների կարգավորման հարցում՝ հիշեցնելով Հայաստանում Փաշինյանի հայտարարությունների հետեւանքով առաջացած ոչ միանշանակ արձագանքը, որը փաստացի կրկնեց Ադրբեջանի կազմից դուրս Լեռնային Ղարաբաղի գոյության անհնարինության մասին պաշտոնական Բաքվի փաստարկը։
Արեշեւը կարծում է, որ Անկարայի պայմաններով հայ-թուրքական հարաբերությունների կարգավորման գործընթացը ոչ պակաս լարվածություն կառաջացնի։
«Տարածաշրջանում լարվածությանը կնպաստեն Ռուսաստանի եւ Թուրքիայի, Իրանի եւ Թուրքիայի միջեւ որոշակի հակասությունները՝ չնայած դրանք հարթելու բազմաթիվ փորձերին։ Կարծում եմ, որ քաղաքական-դիվանագիտական ջանքերը, այդ թվում՝ Ռուսաստանի ջանքերը, այնուամենայնիվ, հնարավորություն կտան հաջորդ տարում խուսափել արմատական ռազմական սցենարներից»,- նշեց նա։
Ավելին՝ սկզբնաղբյուրում
0Comments