Առաջիկա ժամերին դիմադրության ճակատից հնարավոր են կանխարգելիչ միջոցառումներ:
Այս մասին հայտարարել է Իրանի արտգործնախարար Հոսեյն Ամիրաբդոլլահիանը՝ խոսելով Իսրայելի և Գազայի հատվածի միջև պատերազմի մասին, փոխանցում է IRNA-ն։
Նա հիշեցրել է դիմադրության առաջնորդների հետ իր հանդիպումների մասին, այդ թվում՝ լիբանանյան «Հեզբոլլահի» գլխավոր քարտուղար Սայեդ Հասան Նասրալլայի հետ։
«Հեզբոլլահի համար կան բոլոր հնարավոր տարբերակներն ու սցենարները։ Նրանց հաշվարկներում ամեն ինչ ճիշտ է հաշվի առնվել, և դիմադրության առաջնորդները թույլ չեն տա Սիոնիստական ռեժիմին որևէ քայլ ձեռնարկել տարածաշրջանում։
Առաջիկա ժամերին հնարավոր է ցանկացած նախաձեռնողական քայլ»,- ասել է Ամիրաբդոլլահյանը։
Նրա խոսքով, դիմադրության բոլոր առաջնորդները այն կարծիքին են, որ իրենք քաղաքական լուծման հնարավորություն կտան, սակայն «ցանկացած գործողություն հնարավոր է», եթե Իսրայելը շարունակի իր ռազմական հանցագործությունները խաղաղ բնակչության դեմ։
Իրանի արտգործնախարարը վստահեցրել է, որ դիմադրության ճակատն ի վիճակի է «երկարատև պատերազմներ վարել թշնամու դեմ», և շարունակվող հակամարտության ընդլայնումը կփոխի Իսրայելի քարտեզը։
Նա նշել է, որ իսլամական երկրների գործընկերների հետ զրույցների ընթացքում նրանք եկել են այն եզրակացության, որ «եթե ՄԱԿ-ի սահմանափակ հնարավորությունները չօգտագործվեն, ռեժիմի դեմ նոր ճակատներ բացելու հնարավորությունն անխուսափելի է»։
Ամիրաբդոլլահյանն ասել է, որ Իրանը չի աջակցում հակամարտության ընդլայնմանը, սակայն հնարավոր է, որ երկիրը մտնի պատերազմի մեջ, քանի որ ոչ մի կողմ չի կարող անտարբեր մնալ ստեղծված իրավիճակի նկատմամբ։
«Եթե մենք այսօր չպաշտպանենք Գազան, վաղը պետք է պաշտպանենք մեր քաղաքները: Նասրալլան նաեւ հայտարարել է, որ եթե իրենք կանխարգելիչ գործողություններ չձեռնարկեն, ապա ստիպված կլինեն Բեյրութում կռվել սիոնիստական ուժերի դեմ»,- ասել է նա։
«Սիոնիստական ռեժիմը փլուզվեց հոկտեմբերի 7-ին»,- ասել է Ամիրաբդոլլահյանը՝ հավելելով, որ վարչապետ Բենիամին Նեթանյահուն իր թուլության պատճառով պատերազմը մտցրեց պաղեստինցիների տները։
«Անվտանգությունը բարդ խնդիր է, և մեզ համար սա հնարավորություն է՝ կանգնեցնելու սիոնիստներին ներսից»,- ասել է նա։
Իրանի ԱԳ նախարարը նաեւ զգուշացրել է, որ ժամանակը սպառվում է, ՄԱԿ-ը եւ միջազգային հանրությունը պետք է հնարավորինս շուտ քաղաքական լուծում գտնեն՝ նախքան իրավիճակը «եռման կետի» հասնելը։
Իրանի դիվանագիտության ղեկավարը նաև զգուշացրել է ԱՄՆ-ին դադարեցնել աջակցությունը Իսրայելին «քաղաքացիների դեմ կատարած հանցագործությունների համար»՝ ասելով, որ ԱՄՆ-ը չի կարող կողմերին կոչ անել զսպվածություն ցուցաբերել՝ միևնույն ժամանակ աջակցելով «սիոնիստ հանցագործներին»:
0Comments