Սոֆի Գրեգուարը անկեղծորեն խոսել է Կանադայի նախկին վարչապետ Ջասթին Թրյուդոյի հետ ամուսնալուծությունից հետո ուշադրության կենտրոնում գտնվող կյանքի մասին։ 

Arlene is Alone փոդքասթի ժամանակ նա մեկնաբանել է Թրյուդոյի անձնական կյանքի վրա աճող ուշադրությունը, ով, ըստ լուրերի, հանդիպում է երգչուհի Քեթի Փերիի հետ։ Հաղորդավարուհի Արլեն Դիքինսոնը նշել է, որ հիանում է 50-ամյա Գրեգուարի «հանգիստ» արձագանքով ստեղծված իրավիճակին։

«Մենք բոլորս մարդիկ ենք, և մեզ վրա ազդում է այն, ինչ տեղի է ունենում։ Դա նորմալ է», - ասել է Գրեգուարը։ «Բայց թե ինչպես եք արձագանքում, ձեր ընտրությունն է։ Ես նախընտրում եմ լսել երաժշտություն, այլ ոչ թե աղմուկ»։ 

Սոֆի Գրեգուարը և Ջասթին Թրյուդոն հայտարարել են իրենց բաժանման մասին 2023 թվականի օգոստոսին։ Զույգն ամուսնացել է 2005 թվականին և ունի երեք երեխա՝ Քսավիեր, Էլլա-Գրեյս և Հադրիեն։ 

2024 թվականի աշնանը մի անցորդ տեսանկարահանել է Թրյուդոյին և Փերրիին գրկախառնվելիս, իսկ ավելի ուշ նրանք հաստատել են իրենց սիրավեպը՝ միասին հայտնվելով Փարիզի Crazy Horse կաբարեում՝ երգչի ծննդյան օրվա շուրջ։ 

Գրեգուարը խոստովանել է, որ հասկանում է, թե ինչպես «հանրային միջոցառումները կարող են խթան հանդիսանալ»։ «Այն, թե ինչպես եմ ես դրան արձագանքում, դա իմ ընտրությունն է։ Այն կինը, որը ես ուզում եմ դառնալ այս գործընթացում, նույնպես իմ ընտրությունն է», - ընդգծել է նա։ 

Միևնույն ժամանակ, Գրեգուարը նշել է, որ չի խուսափում հույզերից։ «Ես թույլ եմ տալիս ինձ հիասթափվել, զայրանալ, տխրել։ Եվ որպես մեկը, ով աջակցում է հոգեկան առողջության նախաձեռնություններին, ես ճիշտ գիտեմ, թե որքան կարևոր է մշակել այդ զգացմունքները»։ 

Զրույցի սկզբում նա նաև ուղղել է հաղորդավարուհուն, ով նրան անվանել է «միայնակ մայր»։ «Ես անկասկած միայնակ մայր չեմ», - ասել է Գրեգուարը։ «Մենք դեռ ունենք գործընկերություն։ Ջասթինը հայր է, ով իսկապես սիրում է իր երեխաներին և միշտ նրանց կողքին է»։