Հրդեհը, ենթադրաբար, տեղի է ունեցել Ուրուգվայի մայրաքաղաք Մոնտեվիդեոյում ՌԴ դեսպանության շենքում, դեպքի վայր են ժամանել հրշեջները, հաղորդում է РИА Новости-ն՝ հղում անելով տեղական Telenoche հեռուստաալիքին։

Հեռուստաալիքի տվյալներով, տեղի հրշեջները շաբաթ երեկոյան ժամանել են Մոնտեվիդեոյի Պոսիտոս շրջանում գտնվող դեսպանության շենք, քանի որ  օդատարից խիտ ծխի սյուն էր բարձրանում։

Telenoche-ի հրապարակած տեսանյութում կարելի է տեսնել, թե ինչպես են հրշեջները փորձում կտրատել դեսպանատան վերին հարկի պատշգամբում գտնվող օդատարի ցանցը, որից մոխրագույն ծխի քուլաներ են դուրս գալիս։

«Օդատարից սկսեց ծխի խիտ սյուն բարձրանալ, ուստի հրշեջները ստիպված էին սղոցներ օգտագործել՝ պաշտպանիչ ցանցը (օդատարի - խմբ.) կտրելու համար», - հաղորդում է հեռուստաալիքը։

Հեռուստաալիքի տվյալներով, հրշեջները կարողացել են մտնել դեսպանության շենք և բացել բոլոր սենյակների պատուհաններն ու դռները։

Սակայն լրատվամիջոցը տեղեկություններ չի տրամադրում հրդեհի պատճառի, ինչպես նաև միջադեպի հետևանքով տուժածների մասին։