Ֆրանսիայի ոստիկանությունը, որը դեռ որոնում է Փարիզի Լուվրից թանկարժեք իրեր գողացողներին,  հավանաբար, չի կարողանա դրանք վերադարձնել թանգարան, քանի որ զարդերը կարող են արագ մասերի բաժանվել ու վաճառվել: Այս մասին հաղորդում է Reuters-ը՝ հղում անելով իրավապահներին և փորձագետներին։

«Եթե գողանում են Վան Գոգի աշխատանքը, դա Վան Գոգ է։  Անհնար է այն վաճառել այլ ուղիներով, բացի արվեստի գործերի սև շուկայի միջոցով։ Բայց երբ գողանում են թանկարժեք իրեր, ապա հնարավոր է դրանք սև շուկայի միջոցով վաճառել որպես թանկարժեք քարեր», – գործակալությանը հայտնել է մշակութային ժառանգության դեմ հանցագործությունների գծով փորձագետ Մարկ Բալսելսը։

Գործակալությունը նշում է, որ ադամանդները կարելի է ավելի փոքր մասերի բաժանել, իսկ ոսկին՝ վերաձուլել այնպես, որ գնորդները տեղյակ չեն լինի դրանց ծագումից։

«Հենց դրանք բաժանվեն ավելի մանր քարերի, գործն արված է, ամեն ինչ ավարտված է։ Մենք այլևս երբեք չենք տեսնի այդ ցուցանմուշները։ Գողացված արվեստի գործերը վերադարձնելու հավանականությունը շատ փոքր է։ Սակայն, երբ խոսքը թանկարժեք իրերի մասին է, հավանականությունն էլ ավելի փոքր է», – գործակալությանը հայտնել է Քրիստոֆեր Մարտինելոն՝ Art Recovery International կազմակերպության հիմնադիրը, որն զբաղվում է գողացված արվեստի գործերի որոնմամբ։

Հոկտեմբերի 19-ի առավոտյան կողոպտիչները կռունկի միջոցով բարձրացել էին, կոտրել Լուվրի թանգարանի ապակիներից մեկը և Ապոլլոնի սրահից գողացել զարդեր, այդ թվում՝ Նապոլեոն Բոնապարտի և նրա կնոջ հավաքածուից։ Ընդհանուր առմամբ, գողացվել էր 9 զարդ, սակայն դրանցից մեկը՝ Նապոլեոն 3-րդի կնոջ՝ կայսրուհի Եվգենյայի թագն ավելի ուշ թանգարանից ոչ հեռու հայտնաբերվել էր վնասված վիճակում։ Կողոպտիչները դեպքի վայրից փախել են սկուտերներով։ Կողոպուտը տևել է 6-7 րոպե։ Ըստ ԶԼՄ-ների՝ կողոպուտը կատարել է չորս հոգուց բաղկացած խումբը, որոնցից երկուսն են մտել թանգարան:

Լուվրը, որը բացվել է 1793 թվականին, նախկինում լինելով թագավորական նստավայր, մնում է աշխարհի ամենաշատ այցելուներ ունեցող թանգարանը: