ԵԿՄ վարչության նախկին նախագահ Մանվել Գրիգորյանի գործի շրջանակներում քննիչի որոշմամբ կալանք է դրվել նաև «Արա և Այծեմնիկ» ԲԲԸ-ի գույքի և դրամական միջոցների՝ հաշվարկային հաշիվների վրա։ Մանվել Գրիգորյանի պաշտպան Լևոն Բաղդասարյանը լրագրողների հետ զրույցում նշեց, որ միջնորդել էին դատարանին վերացնել ընկերության գույքի և դրամական միջոցների վրա դրված արգելանքը, բայց դատարանը նպատակահարմար է գտել քննարկել միջնորդությունը բուն դատաքննության ընթացքում, երբ Մանվել Գրիգորյանն էլ կմասնակցի նիստին:
Պաշտպանը նշեց, որ արգելանքի արդյունքում պարալիզացվել է՝ ըստ էության, կասեցվել է ընկերության գործունեությունը:
«Տվյալ դեպքում, ոչ միայն այդ գույքերն են արգելանքի, կալանքի տակ, այլ տվյալ ընկերությունների հաշվարկային հաշիվները: Գործունեությունը, ըստ էության, կասեցված է. ֆինանսական շարժ չեն կարողանում կատարել ՝ մասնավորապես, չեն կարողանում պետական պարտավորությունները կատարեն՝ աշխատողների աշխատավարձ, սպասարկման վճար և այլ վճարներ: Այդ ընկերությունները Մանվել Գրիգորյանի մերձավորներին, հարազատներին են պատկանում»,- նշեց պաշտպանը:
Լևոն Բաղդասարյանը, անդրադառնալով Մանվել Գրիգորյանի խափանման միջոցի փոփոխության հարցով ևս մեկ միջնորդություն ներկայացնելուն, ասաց, որ դատարանի որոշումը հիմնավորված չի եղել, այդ պատճառով ևս մեկ միջնորդություն էին ներկայացրել:
0Comments