Լավրովի խոսքերը վկայում են այն մասին, որ արդեն Մոսկվայում գտնում են՝ ՀՀ իշխանությունները բացահայտ գնում են դաշնակցային հարաբերությունների խզման: Այս մասին Tert.am-ի հետ զրույցում հայտնեց Ռազմավարական հետազոտությունների և նախաձեռնությունների վերլուծական կենտրոնի տնօրեն Հայկ Խալաթյանը՝ անդրադառնալով Ալեն Սիմոնյանի հայտարարությանն այն մասին, որ Թուրքիայի հարձակման դեպքում ռուսական կողմը չի պաշտպանի Հայաստանին:
«Հետագա բոլոր զարգացումների մեղքը Մոսկվան փորձելու է դնել ՀՀ իշխանությունների վրա: Ցավոք սրտի, մենք տեսնում ենք, որ նույնիսկ հայկական ԶՈւ-ն, որը ենթարկվում է ներկա իշխանություններին, չի ապահովում երկրի պաշտպանությունը: Մենք տեսնում ենք Տավուշի գյուղերի հանձնումը և թե ինչ վտանգավոր հետևանքներ դա կարող է ունենալ։ Խոսքը միայն տարածքների հանձման մասին չէ, ամբողջությամբ փլուզվելու է պաշտպանական գիծը, էներգետիկ խնդիրների առաջ ենք կանգնելու, կոմունիկացիոն նույնպես: ՀՀ իշխանությունը, անգամ վստահ չլինելով, որ դա կօգնի խուսափել պատերազմից, առաջ է տանում այդ գիծը»,- նշեց մեր զրուցակիցը:
Խալաթյանի խոսքով՝ ՀՀ իշխանություններից արդեն պետք չէ ակնկալել, որ կպաշտպանեն ՀՀ ազգային շահերը:
«Արդեն պետք է դիմել այն մարդկանց, ովքեր պետք է կատարեն այս իշխանության հրամանները, որ հասկանան՝ երբ ապօրինի հանձնում ես ՀՀ տարածքներ առանց դելիմիտացիայի, դեմարկացիայի, առանց բոլոր օրենսդրական նորմերը պահպանելու, իբր պատերազմից խուսափելու համար, ուշ թե շուտ ՀՀ-ում իշխանափոխություն է տեղի ունենալու, և այդ ժամանակ այդ մարդիկ չեն կարողանալու բացատրել իրենց քայլերը, որ հրամաններ էին կատարում: Բոլորը պատասխանելու են օրենքի առջև իրենց կատարած գործողությունների համար: ՀՀ իշխանությունները չեն պաշտպանելու թե՛ ՀՀ սահմանները, թե՛ ՀՀ շահերը»,- ընդգծեց մեր զրուցակիցը:
Ադրբեջանից ավելի լավ են բացատրում՝ ինչու պետք է նրանց տարածքը մեծանա և Հայաստանի տարածքը փոքրանա:
«Գլխավոր նպատակը իշխանության պահպանումն է: Նիկոլ Փաշինյանը 2020թ-ից հետո իր ամբողջ խաղադրուքը դրել է «Խաղաղության դարաշրջան»-ի վրա, որն արդեն դարձել է «Խաղաղության խաչմերուկ», բայց Ադրբեջանին և Թուրքիային խաղաղություն պետք չէ, նրանց պետք է հայկական գործոնի չեզոքացումը տարածաշրջանում: ՀՀ իշխանությունները չեն ուզում հասկանալ, որ ձախողել են այդ քաղաքականությունը: Փաստացի, Նիկոլ Փաշինյանը բերել է բանակցությունները մի կարգախոսի՝ «Ժամանակավոր խաղաղություն՝ տարածքների դիմաց» և տարածքներ հանձնելով կփորձի գոնե մի քանի ամիս բավարարել Ադրբեջանին»,- շեշտեց Հայկ Խալաթյանը:
Մանրամասները՝ տեսանյութում։
0Comments