Սպանվել են Ռուսաստանի գազի ոլորտի բարձրաստիճան պաշտոնյաներ. Սպանել են նաև ընտանիքների անդամներին

Իսպանիայում մահացած են գտել ռուսական խոշորագույն Novatek գազային ընկերության նախկին թոփ-մենեջեր Սերգեյ Պրոտոսենյային։ Լյորետ դե Մար առողջարանային քաղաքի տներից մեկում հայտնաբերվել են նաև միլիոնատիրոջ կնոջ և դստեր դիերը։ Այս մասին, Լրագրի փոխանցմամբ, հայտնում է Telecinco հեռուստաալիքը։

Հեռուստաալիքի տվյալներով՝ ընտանիքին պատկանող վիլլայում հայտնաբերվել են գործարարի կնոջ և 18-ամյա դստեր դիերը՝ դանակահարված։ Պրոտոսենյայի մարմինը հայտնաբերվել է այգում։ Նա մահացել է խեղդամահությունից։ Նրա կողքին հայտնաբերվել է կացին և դանակ։

Պրոտոսենյայի ընտանիքը ապրում էր Ֆրանսիայում, և նրանք Իսպանիա էին մեկնել Զատկի տոներին։ Նովատեկի նախկին թոփ-մենեջերի կարողությունը գնահատվում է 400 մլն եվրո։

Ապրիլի 18-ին Մոսկվայի բնակարանում սպանված են գտել ռուսական Գազպրոմբանկի 51-ամյա նախկին փոխնախագահ Վլադիսլավ Ավաևին, նրա 47-ամյա կնոջը՝ Ելենային և 13-ամյա դստերը՝ Մարիային։