Հունիսի 12-ին 86 տարեկանում մահացել է Իտալիայի նախկին վարչապետ Սիլվիո Բեռլուսկոնին։ Ամենաէքսցենտրիկ ու սկանդալային քաղաքական գործիչներից մեկը չորս անգամ զբաղեցրել է Իտալիայի կառավարության ղեկավարի պաշտոնը, ինչը բացարձակ ռեկորդ է երկրի համար։
Բեռլուսկոնիի կյանքի ուղին, քաղաքական կարիերան և նրա հետ կապված սկանդալները՝ «Կոմերսանտ»-ի ֆոտոշարքում՝ Tert.am-ի փոխանցմամբ։
Ապագա քաղաքական գործիչը ծնվել է 1936 թվականի սեպտեմբերի 29-ին Իտալիայի Միլան քաղաքում։ Չնայած նրա ընտանիքը հարուստ չէր (հայրը՝ Լուիջի Բեռլուսկոնին, աշխատում էր բանկում, իսկ մայրը՝ Ռոզելլա Բոսսին, տնային տնտեսուհի էր), ծնողները փորձել են իրենց որդուն լավ կրթություն տալ։ Սիլվիո Բեռլուսկոնին եղել է կաթոլիկ լիցեյի լավագույն ուսանողներից մեկը, իսկ հետո գերազանցությամբ ավարտել է Միլանի համալսարանի իրավաբանական ֆակուլտետը։ Գովազդային բիզնեսի իրավական կարգավորման հիմնախնդիրների վերաբերյալ թեզային աշխատանքի համար նա արժանացել է 2 մլն լիրա մրցանակի։
Ես սիրտ ունեմ, ամեն ինչ անում եմ օգնելու մարդկանց, որոնք օգնության կարիք ունեն
Որպես ուսանող՝ Սիլվիո Բեռլուսկոնին ցանկացած աշխատանք անում էր: Նա վաճառում էր կենցաղային իրեր, լուսանկարիչ էր հարսանիքների և թաղումների ժամանակ, ելույթ էր ունենում գիշերային ակումբում, հաճախ կես դրույքով աշխատում էր զբոսաշրջային նավերում, որտեղ երգում և կոնտրաբաս էր նվագում: 1957 թվականին Բեռլուսկոնին ստացել է իր առաջին մշտական աշխատանքը Immobiliare costruzioni շինարարական ընկերությունում։ 1961 թվականին Սիլվիո Բեռլուսկոնին հիմնել է իր առաջին փոքր ընկերությունը՝ Cantieri Riuniti Milanesi-ն, իսկ մեկ տարի անց՝ մեկ այլ՝ Edilnord-ը։ Հաջորդ 20 տարիներին շինարարական բիզնեսը նրա գործունեության հիմնական ոլորտն էր։
70-ականներին Սիլվիո Բեռլուսկոնին ձեռք է բերել հայտնի Il Giornale շաբաթաթերթի բաժնետոմսերը։ 1980 թվականին նա ստեղծել է Canale 5-ը՝ առաջին ազգային կոմերցիոն հեռուստատեսային ցանցն Իտալիայում։ Մի քանի տարի անց նա ստեղծել է Italia և Retequatro ալիքները, որոնք հետագայում վերածվել են Mediaset մեդիա հոլդինգի։ Շուտով Սիլվիո Բեռլուսկոնին դուրս է եկել հեռահաղորդակցության արտասահմանյան շուկա և իր հոլդինգին ավելացրել ֆրանսիական, գերմանական և իսպանական հեռուստաալիքներ։ Ավելի ուշ Բեռլուսկոնիի բոլոր նախագծերը՝ ավելի քան 150 ընկերություններ ԶԼՄ-ների, ապահովագրության, շինարարության, բանկային և այլ ոլորտներում, միավորվել են Fininvest հոլդինգային մեդիա խմբի մեջ։
1990-ականներին Սիլվիո Բեռլուսկոնին իր ուշադրությունը սևեռեց քաղաքականությանը: 1994 թվականի հունվարի 26-ին նա որոշել է թողնել Fininvest հոլդինգային ընկերության ղեկավարի պաշտոնը և գլխավորել իր ստեղծած քաղաքական կուսակցությունը (Forza, Italia), որի հետ նույն տարի գնացել է խորհրդարանական ընտրությունների։
Մենք պարզապես ցանկանում ենք մեր թիմը թարմացնել այն մարդկանցով, որոնք կրթված են, պատրաստված և հետևում են իրենց, գիտեն, թե ինչպես պետք է էլեգանտ հագնվել և չեն մոռանում լոգանք ընդունել՝ ի տարբերություն որոշ այլ կուսակցությունների ներկայացուցիչների
1994 թվականի ընտրություններում նրա ստեղծած «Առա՛ջ, Իտա՛լիա» կուսակցությունը աջ կենտրոնամետ կոալիցիայի կազմում հաղթել է, և Բեռլուսկոնին ընտրվել է վարչապետ, բայց մեկ տարի չանցած՝ 1995 թվականի հունվարին, նա հրաժարական է տվել։ Քաղաքական գործիչը 2001 թվականին կրկին կարողացել է ստանձնել վարչապետի պաշտոնը և նախարարների կաբինետի ղեկավարում մնացել մինչև 2006 թվականը։ Ընդդիմության մեջ գտնվելու կարճ ժամանակահատվածից հետո Բեռլուսկոնիի կուսակցությունը, որն արդեն կոչվում էր «Ազատության ժողովուրդ», և նրա դաշնակիցները ջախջախիչ հաղթանակ տարան 2008 թվականի ընտրություններում։ Այս անգամ Բեռլուսկոնին վարչապետի պաշտոնը զբաղեցրել է մինչև 2011 թվականի նոյեմբերը, երբ զարգացող տնտեսական ճգնաժամի և Իտալիայի սուվերեն պարտքի նկատմամբ եվրոպական բորսաների անվստահության ֆոնին նա ստիպված էր հեռանալ պաշտոնից։
Եթե ամուսնացած չլինեի, առանց վարանելու կամուսնանայի ինքս ինձ հետ
Սիլվիո Բեռլուսկոնին պաշտոնապես երկու անգամ ամուսնացած է եղել։ Նա 20 տարի ամուսնացած էր իր առաջին կնոջ՝ Կարլա Էլվիրա Դել Օլիոյի հետ։ 1990 թվականին Բեռլուսկոնին ամուսնացել է իտալացի դերասանուհի Վերոնիկա Լարիոյի հետ. նրանց ամուսնությունը տևել է ավելի քան 30 տարի։ Բեռլուսկոնին ունի հինգ երեխա:
Իտալիայի վարչապետ Սիլվիո Բեռլուսկոնին և ԱՄՆ նախագահ Ջորջ Բուշը (2003 թ.)
Ես այնքան թափանցիկ եմ, իմ բոլոր գործերում մաքուր եմ, չգիտեմ, թե ինչը կարող է դժգոհություն առաջացնել
Քաղաքական գործիչը տարբեր քրեական գործերով մեղադրյալ է դարձել ավելի քան 50 անգամ։ Դրանց թվում են կաշառակերության, խոշոր խարդախության, հարկերից խուսափելու և անչափահասների հետ սեռական կապի վերաբերյալ մեղադրանքները: Մեղադրանքներից մեկով նա դատապարտվել է մեկ տարվա հասարակական աշխատանքի՝ ծերանոցում։ Ինչպես հավաստիացրել է ինքը՝ Բեռլուսկոնին, մեծապես վայելել է պատիժը կրելու գործընթացը:
«Բեռլուսկոնիի հետ մենք վաղեմի ընկերներ ենք։ Սիլվիոն համաշխարհային մակարդակի քաղաքական գործիչ է, իսկական առաջնորդ», - ասել էր ՌԴ նախագահ Վլադիմիր Պուտինը:
Քաղաքականության մեջ Սիլվիո Բեռլուսկոնիի գլխավոր ընկերներից և համախոհներից մեկը Ռուսաստանի նախագահ Վլադիմիր Պուտինն էր: Իտալիայի վարչապետը իր ընկերոջը՝ Պուտինին, բազմիցս հրավիրել է այցելելու իր «Սերտոսա» վիլլա, իսկ Պուտինն ի պատասխան նրան կանչել է Սոչիի իր նստավայր՝ «Բոչարով Ռուչեյ»։ Հաճախ քաղաքական գործիչների հանդիպումները եղել են ընկերական և ոչ պաշտոնական։
Ես սուրբ չեմ, դուք բոլորդ արդեն տեսել եք դա
2005 թվականին Սիլվիո Բեռլուսկոնին երրորդ անգամ է դարձել Իտալիայի վարչապետ։ Նրա գլխավորած կառավարությունը մեկ տարի է գոյատևել՝ հրաժարական տալով ընտրություններից հետո շարունակվող իշխանական ճգնաժամի պատճառով։ 2008 թվականին Սիլվիո Բեռլուսկոնիի չորրորդ վարչապետությունը նշանավորվել է Իտալիայում ծանր ֆինանսական ճգնաժամով: Միաժամանակ երկրում սկսել են լայնորեն քննարկվել վարչապետի անձնական կյանքի շուրջ սկանդալները՝ նրան մեղադրել անչափահասին սեռական ծառայությունների դիմաց վճարելու, կաշառակերության և պաշտոնեական դիրքի չարաշահման համար։ 2011 թվականի նոյեմբերի 12-ին, մի շարք աղմկահարույց սկանդալներից հետո, Սիլվիո Բեռլուսկոնին հրաժարական է տվել։
2006 թվականի նոյեմբերի 26-ին Սիլվիո Բեռլուսկոնին ուշագնաց է եղել իր կողմնակիցների հետ շփման ժամանակ։ Այն ժամանակ քաղաքական գործիչն իր ուշագնացությունը բացատրել էր սարսափելի շոգով և տոթով։ Սակայն որոշ լրատվամիջոցներ ենթադրում էին, որ նա նյարդայնացած էր առաջիկա կոռուպցիոն լսումներից, որոնց համար նրան սպառնում էր 12 տարվա ազատազրկում։ 2012 թվականի հոկտեմբերի 26-ին Բեռլուսկոնին դատապարտվել է չորս տարվա ազատազրկման հարկային հանցագործությունների համար, սակայն քաղաքական գործչի տարիքի պատճառով, իտալական օրենսդրության համաձայն, դատարանը պատիժը փոխարինել է մեկ տարվա հասարակական աշխատանքով։ Միաժամանակ քաղաքական գործիչը կորցրել էր վեց տարով պետական պաշտոններ զբաղեցնելու և ընտրություններին մասնակցելու իրավունքը։
Սիլվիո Բեռլուսկոնին իրեն անվանում էր «Միլան» ֆուտբոլային ակումբի ամենամեծ երկրպագուն։ Նրա սերն ակումբի հանդեպ այնքան ուժեղ էր, որ նա 1984 թվականին գնել է այն՝ խոստանալով այն ժամանակվա B դիվիզիոնի ակումբը բարձրագույն լիգա տանել։ Գործարարը կատարել է իր խոստումը. Միլանը ութ անգամ հաղթել է Իտալիայի առաջնությունը (1988, 1992 - 1994, 1996, 1999, 2004 և 2011 թվականներին), հինգ անգամ՝ Չեմպիոնների լիգան (1989, 1990, 1994 և 2003 թվականներին), երեք անգամ՝ ֆուտբոլի միջմայրցամաքային գավաթի խաղարկությունը: Բեռլուսկոնիի ժողովրդականությունը այդ տարիներին հասել է աննախադեպ բարձունքների, և ընտրություններում նրա ընտրողներից են դարձել «Միլանի» հավատարիմ երկրպագուները։
Ինձ չի հետաքրքրում, թե երրորդ և չորրորդ կարգի դիվանագետները ինչ կասեն իմ մասին. ես չեմ մասնակցում որևէ վայրի խնջույքների, միայն՝ բարձրաճաշակ երեկոների
Իտալիայի նախկին վարչապետի Certosa վիլլայում անցկացված երեկույթները մեծ հետաքրքրություն են առաջացրել մամուլի շրջանում։ Բեռլուսկոնին հրավիրել է իր ընկերներին, ինչպես նաև օտարերկրյա պետությունների ղեկավարներին։ Լրատվամիջոցների տեղեկություններով՝ ինտիմ ծառայությունների մատուցումը խնջույքների մաս է եղել։ Հսկայական սկանդալ է առաջացրել Չեխիայի վարչապետ Միրեկ Տոպոլանեկի մամուլում հրապարակված լուսանկարը, որում նա մերկ է: Պաշտոնյան երեկույթի հյուրերից էր։
Սիլվիո Բեռլուսկոնին համարվում էր Լիբիայի հանգուցյալ առաջնորդ Մուամար Քադաֆիի քաղաքական դաշնակիցներից մեկը Եվրոպայում։ 2008 թվականի օգոստոսի 30-ին Լիբիան և Իտալիան ստորագրել են Բարեկամության և համագործակցության պայմանագիրը, որը, սակայն, չի խանգարել Սիլվիո Բեռլուսկոնիին շարունակել աջակցել Լիբիայում Քադաֆիին տապալելուն ուղղված ռազմական գործողությանը։
Քաղաքականության մեջ ես Հիսուս Քրիստոսն եմ: Ես համբերատար զոհ եմ, բոլորի հետ ընդհանուր լեզու եմ գտնում, զոհաբերում եմ ինձ հանուն բոլորի
Սիլվիո Բեռլուսկոնին հայտնի էր պլաստիկ վիրահատություններից իր կախվածությամբ։ 2004 թվականին քաղաքական գործիչը պաշտոնապես հաստատել էր, որ պլաստիկ վիրահատության է ենթարկվել, մասնավորապես՝ «հարթել է աչքերի շուրջ կնճիռները»։ 2009 թվականի դեկտեմբերին Իտալիայի վարչապետի վրա հարձակվել են. նրա դեմքին գցել են արձանիկ, որի հետևանքով վնասվել են նրա ատամները, քիթը կոտրվել է և խիստ վնասվել է վերին շրթունքը: Ավելի ուշ հարձակվողը ներողություն է խնդրել վարչապետից՝ իր արարքը բացատրելով որպես «դժգոհություն նրա վարած քաղաքականությունից»։
Երբ կանանց հարցնում են, թե արդյոք ցանկանում են սեքսով զբաղվել ինձ հետ, նրանց 30%-ը պատասխանում է «այո՛», իսկ 70%-ը՝ «ի՞նչ, նորի՞ց»
Իտալիայում Սիլվիո Բեռլուսկոնիի սիրառատության մասին լեգենդներ կան։ Լրատվամիջոցները բազմիցս գրել են, որ այն կանայք, որոնց հետ քաղաքական գործիչը հարաբերություններ է ունեցել, հետո պաշտոններ են ստացել նրա կառավարությունում կամ հեռուստատեսությունում։ 2011-ին Սիլվիո Բեռլուսկոնին մեղադրվում էր անչափահաս մարմնավաճառների ծառայություններից օգտվելու և իր վիլլաներից մեկում օրգիաներ կազմակերպելու, ինչպես նաև պաշտոնեական դիրքը չարաշահելու համար:
Ինձ ամենուր լրտեսում են, իմ հեռախոսային խոսակցությունները վերահսկվում են, բայց դա ինձ չի անհանգստացնում
2013 թվականի մայիսի 13-ին Իտալիայի դատախազությունը անչափահաս աղջկա՝ «սրտակեր Ռուբիի» գործով Սիլվիո Բեռլուսկոնիի համար պահանջել է վեց տարվա ազատազրկում։ Մեղադրող կողմը նաև խնդրել է Բեռլուսկոնիին ցմահ արգելել պետական պաշտոններ զբաղեցնել։ 2013 թվականի հունիսի 24-ին նա դատապարտվել է 7 տարվա ազատազրկման և պետական պաշտոն զբաղեցնելու ցմահ արգելքի։ 2014 թվականի հուլիսի 18-ին Միլանի վերաքննիչ դատարանը լիովին արդարացրել է Բեռլուսկոնիին այս գործով, չեղարկել բոլոր պատիժները, որոնք նշանակվել էին անբավարար ապացույցների և հանցակազմի բացակայության պատճառով։
Ես իշխանության եմ եկել ոչ հանուն ազդեցության. ես ամբողջ աշխարհում ունեմ տներ, հսկայական զբոսանավեր, գեղեցիկ ինքնաթիռներ, գեղեցիկ կին և հիանալի ընտանիք։ Քաղաքականության մեջ իմ ներգրավվածությունը զոհաբերություն է
Լուսանկարում՝ Սիլվիո Բեռլուսկոնին դստեր՝ Բարբարայի հետ
Ես արժանի եմ, որ ինձ հանգիստ թողնեն, որքա՞ն կարելի է ներխուժել իմ անձնական կյանք
Միջազգային ասպարեզում չկա մի քաղաքական գործիչ, որը կարող է մրցել ինձ հետ
2019 թվականի մայիսի 26-ին կայացած ընտրությունների արդյունքներով «Առաջ Իտալիա» կուսակցությանն աջակցել է ընտրողների միայն 8,78%-ը։ Սակայն Բեռլուսկոնին, որը գլխավորում էր կուսակցական ցուցակները բոլոր շրջաններում, բացի կենտրոնականից, անցել է Եվրախորհրդարան։ 2020 թվականի սեպտեմբերին նա վարակվել է կորոնավիրուսով և հոսպիտալացվել։ Հիվանդանոցից դուրս գրվելուց հետո Բեռլուսկոնին կորոնավիրուսի դեմ պայքարն անվանել է «իր կյանքի ամենավտանգավոր փորձությունը»:
Լուսանկարում՝ Բեռլուսկոնին Եվրախորհրդարանի նախագահի ընտրություններին
Ի՜նչ ցավալի է, որ մենք բոլորս մի օր կմեռնենք, իսկ աշխարհում դեռ այնքան հրաշալի և գեղեցիկ բաներ կլինեն
0Comments