Որն է ԼՂ հակամարտության հարցում Չինաստանի այդչափ զգուշավոր դիրքորոշման պատճառը. Военное Обозрение

Լեռնային Ղարաբաղի զինված հակամարտության հարցում աշխարհի խոշորագույն տերությունների շրջանում առավել զգուշավոր դիրքորոշում զբաղեցնող երկրներից մեկը Չինաստանն է։ Չինացի դիվանագետները չափազանց հազվադեպ են հանդես գալիս Հայաստանի և Ադրբեջանի հակամարտության վերաբերյալ մեկնաբանություններով, իսկ եթե հանդես են գալիս, ապա փորձում են դա անել չափազանց զգուշորեն, Թերթ․am-ի փոխանցմամբ գրում է Военное Обозрение-ն։

Փորձագետները Չինաստանի նման դիրքորոշումը բացատրում են ոչ միայն այն հանգամանքով, որ Պեկինի համար նման արտաքին քաղաքականությունը վերջին տարիներին եղել և մնում է ավանդական:

Տեսակետներից մեկի համաձայն՝ պաշտոնական Պեկինի համար նույնիսկ հռետորաբանության տեսանկյունից անընդունելի է որևէ կերպ ցույց տալ, որ երկիրը կարող է որոշակի դիրքորոշում զբաղեցնել այդ հակամարտության հարցում։ Պեկինի համար, ինչպես և Մոսկվայի դեպքում, կարևոր է, որ Հարավային Կովկասի տարածաշրջանն առավելագույնս հանգիստ լինի, քանի որ դրա միջոցով անցնում է այսպես կոչված նոր «Մետաքսի ճանապարհի» հիպոթետիկ ուղղություններից մեկը՝ հսկայական տնտեսական և լոգիստիկ նախագիծը, որը փորձում է իրականացնել Չինաստանի կառավարությունը:

Չինաստանը նաև Կովկասում տեղի ունեցող իրադարձությունները տեսականորեն դիտարկում է որպես հնարավոր սպառնալիք, որոնց բախվում է կամ կարող է բախվել և ինքը՝ Չինաստանը: Օրինակ՝ Թայվանը․ Չինաստանն այդ տարածաշրջանը համարում է «անջատողական և շրջափակված»։ Չինաստանի իշխանությունները բազմիցս հայտարարել են, որ պատրաստ են կղզու համար պատերազմ վարել։

Դրա հետ մեկտեղ Պեկինում հասկանում են, որ երկիրն ունի նաև Տիբեթ, որտեղ հաճախ ի հայտ են գալիս ուժեր, որոնք փորձում են այն հեռացնել Չինաստանից, և առկա է նաև Լադակհի խնդիրը, որի համար պատրաստ է պատերազմել հարևան Հնդկաստանը: Եվ եթե Պեկինը մի խոսքով քաջալերի Անդրկովկասի հակամարտության կողմերից մեկին, ապա արտաքին ուժերը կարող են դա օգտագործել հենց Չինաստանի դեմ՝ իր սեփական տարածքներում։