Ղարաբաղյան չկարգավորված հակամարտությունը այն դարձնում է սպառնալիքի մշտական աղբյուր ՀԱՊԿ երկրների անվտանգության համար, ըստ ՏԱՍՍ-ի հայտարարել է ռազմական կառույցի Միացյալ շտաբի ղեկավար, գեներալ-գնդապետ Անատոլի Սիդորովը:
Վերջինս նաև հավելել է, թե այժմ խնդրի քաղաքական կարգավորման շուրջ ջանքերն ակտիվացել են, սակայն լիակատար հրադադարի համար դեռ շատ քայլեր են անհրաժեշտ: «Մինչև դա չարվի, ղարաբաղյան հակամարտությունը մնում է տարածաշրջանային անվտանգությանը սպառնացող վտանգի հիմնական աղբյուրը», - ասել է ռուս գեներալը:
Նախօրեին Նյու Յորքում կայացավ Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հանդիպումը՝ ԵԱՀԿ Մինսկի խմբի համանախագահների ու ԵԱՀԿ գործող նախագահի անձնական ներկայացուցիչ Անջեյ Կասպշիկի մասնակցությամբ։
Հայաստանի արտգործնախարարության լրատվության և հասարակայնության հետ կապերի վարչության փոխանցմամբ՝ զրուցակիցները քննարկել են Լեռնային Ղարաբաղի խաղաղ գործընթացին առնչվող հարցերի շրջանակ և գնահատել են ներկա իրավիճակը։ Կողմերը նախանշել են հետագա քայլերը, այդ թվում՝ համանախագահների այցը տարածաշրջան և մոտ ժամանակներում արտգործնախարարների մակարդակով հերթական հանդիպման անցկացումը։
Մնացականյան-Մամեդյարով բանակցությունների նախօրեին սրվել է իրավիճակը հակամարտության գոտում։ Հայկական կողմը հայտարարեց դիվերսիայի փորձը կասեցնելու մասին։ Ադրբեջանական կողմն ունի մեկ զոհ։
Նյու Յուրքում, Հայաստանի ու Ադրբեջանի ԱԳ նախարարների հանդիպմանը հայկական կողմը կարևորել է զինադադարի ամրապնդման և լարվածության նվազեցման ուղղությամբ շարունակական ջանքերի գործադրումը՝ ներառյալ համապատասխան մեխանիզմների ներդրման և ամրապնդման միջոցով։ Ընդգծվել է նաև վստահության մթնոլորտի ձևավորման ուղղությամբ հետևողական քայլերի անհրաժեշտությունը, այդ թվում՝ նախկինում ձեռք բերված պայմանավորվածությունների կյանքի կոչման միջոցով:
Ադրբեջանի տարածքում կալանքի մեջ գտնվող ՀՀ քաղաքացիների առնչությամբ՝ հայկական կողմը շեշտել է վերջիններիս հայրենադարձության ապահովման անհրաժեշտությունը: Խաղաղ գործընթացի առաջմղման տեսակետից Մնացականյանը կարևորել է կարգավորման շրջանակում կողմերի ստանձնելիք հանձնառությունների համաչափության ապահովումը՝ վերահաստատելով գործընթացում Հայաստանի սկզբունքային դիրքորոշումը և մոտեցումները։
Կողմերը նախանշել են այս ուղղությամբ հետագա քայլերը, այդ թվում՝ համանախագահների այցը տարածաշրջան և մոտ ժամանակներում ԱԳ նախարարների մակարդակով հերթական հանդիպման անցկացումը, ասված է պաշտոնական հաղորդագրությունում:
Մնացականյան - Մամեդյարով նախորդ հանդիպումը կայացել էր հունիսի 20-ին Վաշինգտոնում: Այդ հանդիպումից հետո Ադրբեջանի արտաքին քաղաքական գերատեսչության ղեկավարը հայտարարել էր, թե «անպայման չէ շփման գծում վերականգնել անդորրը և նոր բանակցություններ վարել, մենք պետք է բովանդակային բանակցություններ վարենք»: Իսկ Հայաստանի արտգործնախարարության խոսնակ Աննա Նաղդալյանը, արձագանքելով Մամեդյարովի հայտարարությանը, ասել էր, որ Ադրբեջանի արտգործնախարարի պնդումները չեն համապատասխանում իրականությանը:
Նյու Յորքում Ադրբեջանի արտգործնախարարը մասնակցել է նաև Իսլամական համագործակցության կազմակերպության հավաքին, որի ընթացքում հերթական անգամ կոշտ հայտարարությունն է հանդես եկել Հայաստանի ուղղությամբ՝ նշելով, թե «Հայաստանի ղեկավարության վերջին հայտարարությունները վկայում են, որ գործող կառավարությունը շարունակում է ակնհայտորեն խախտել միջազգային իրավունքի նորմերն ու սկզբունքները»: Մամեդյարովի խոսքով՝ ղարաբաղյան խնդրի շուրջ բանակցությունների ապագան կախված է «վճռականորեն գործելու՝ միջազգային հանրության, այդ թվում՝ Իսլամական համագործակցության կազմակերպության պատրաստակամությունից և վճռականությունից»:
Առաջիկա օրերին նաև ՄԱԿ-ի ամբիոնը կդառնա արցախյան թեմայի արծարծման վայր: Հայաստանն ու Ադրբեջանը կխոսեն Ղարաբաղի խնդրի մասին: Ամեն ինչ տանում է նրան, որ հայկական կողմը դարձյալ հայտնվում է Ադրբեջանի՝ պահանջներ ու մեղադրանքն հնչեցնելու հիմնական ուղղությունը:
Մետաքսյա Շալունց, գրում է hayeli.am
0Comments