Գեներալ Վալերի Զալուժնին, ով նախօրեին լքել է Ուկրաինայի զինված ուժերի գլխավոր հրամանատարի պաշտոնը, Ուկրաինայի հերոսի կոչում է շնորհվել։ Համապատասխան հրամանագիրը ստորագրել է Ուկրաինայի նախագահ Վլադիմիր Զելենսկին։ Փաստաթուղթը Զելենսկու գրասենյակը հրապարակել է փետրվարի 9-ին։
Նախագահի հրամանագրում ասվում է, որ Զալուժնին նշանավորվել է «Ուկրաինայի պետական ինքնիշխանության և տարածքային ամբողջականության պաշտպանության գործում ունեցած անձնական ձեռքբերումների, ուկրաինացի ժողովրդին անձնուրաց ծառայության համար»։
Ուկրաինայի հերոսի կոչման հետ մեկտեղ Զալուժնին արժանացել է Ոսկե աստղի շքանշանի։
Բացի այդ, Զելենսկին հրամանագիր է ստորագրել, որով Ուկրաինայի հերոսի կոչում է շնորհվում Հետախուզության գլխավոր վարչության պետ Կիրիլ Բուդանովին։ Strana հրատարակությունը հիշեցնում է, որ Բուդանովը համարվում էր Զալուժնիի հնարավոր իրավահաջորդներից մեկը Ուկրաինայի Զինված ուժերի գլխավոր հրամանատարի պաշտոնում։
Փետրվարի 8-ին Վլադիմիր Զելենսկին Վալերի Զալուժնիին ազատել է Ուկրաինայի Զինված ուժերի գլխավոր հրամանատարի պաշտոնից, որը նա զբաղեցնում էր 2021 թվականից։ Գերագույն գլխավոր հրամանատարի տեղը զբաղեցրել է Ալեքսանդր Սիրսկին, ով նախկինում ղեկավարել է Ուկրաինայի ցամաքային զորքերը։
0Comments