Բռնությունն իր բոլոր դրսեւորումներով մեզ համար մերժել է եւ անընդունելի:
Այս մասին այսօր նոյեմբերի 22-ին, Երեւանի ավագանու նիստում հայտարարեց քաղաքապետ Տիգրան Ավինյանը՝ անդրադառնալով նախօրեին տեղի ունեցած միջադեպին:
Նա, մասնավորապես, ասաց. «Ավագանու նիստերի դահլիճում, եւ դահլիճից դուրս, լինի դա ֆիզիկական բռնություն, լինի դա խոսքով, ուղղակի անընդունելի է եւ համապատասխան միջոցներ պետք է ձեռնարկվեն, որպեսզի այդ բռնությունը որեւէ իր դրսեւորմամբ այս դահլիճում տեղ չունենա:
Ըստ մեր կանոնակարգի, մեր քննարկվող հարցերը, տրվող հարցերը, հնչող ելույթները պետք է վերաբերեն այն հարցերին, որոնք կան օրակարգում: Մենք ունենք ավելի ազատ ֆորմատի հարցուպատասխանի ժամանակ եւ ունենք ավելի ազատ ելույթների հնարավորություն այլ ֆորմատի ժամանակ: Ես կխնդրեմ բոլորին այս կանոնները պահպանել:
Ես ուզում եմ հատուկ շեշտել, որ այս տեսակ իրադարձությունները կանխելու համար ես անձամբ չեմ նայելու՝ մեր խմբակցության ավագանու անդամն է, թե ընդդիմադիր խմբակցության, բոլորին հավասարաչափ վերաբերմունք է լինելու: Իմ լիազորությունների շրջանակում ուզում եմ երեք զգուշացում տալ. տիկին Սոնա Աղեկյանին, տիկին Հայրապետյանին եւ տիկին Անի Խաչատրյանին:
Խնդրում եմ գնահատել այն հետեւանքները, որ խոսքը կարող է ունենալ, որովհետեւ եթե խոսքը պարունակում է բռնություն, այն ինչ-որ փուլում վերածվում է ֆիզիկական բռնության:
Ուզում եմ նաեւ հատուկ զգուշացնել վարչական շրջանների ղեկավարներին, բոլորին, որոնք երեկ մասնակցել են այդ հրմշտոցներին: Իրենց նույնպես հետագա որեւէ նմանատիպ արարք չի ներվելու: Չեմ առանձնացնում ոչ մեկին, չնայած վստահաբար, մեկը մի քիչ ավել, մեկը մի քիչ պակաս է մասնակցել: Ուզում եմ իմ թիմակիցներին զգուշացնել, որ հետագայում որեւէ նմանատիպ քայլ չի ներվելու»:
0Comments