«Լեռնային Ղարաբաղի հայ ժողովուրդ» տերմինաբանությունը հակասում է Ադրբեջանի տարածքային ամբողջականությանը և ինքնիշխանությանը։
Այդ մասին, ըստ «Թրենդ» լրատվական գործակալության, հայտարարել է Ադրբեջանի արտաքին գերատեսչության մամլո խոսնակ Այհան Հաջիզադեն:
Այդ մեկնաբանությամբ նա արձագանքել է ԱՄՆ Սենատում լսումների ընթացքում պետքարտուղարի օգնականի պաշտոնակատար Յուրի Քիմի հնչեցրած հայտարարւթյուններին:
«Խաղաղ պայմանագրում «Լեռնային Ղարաբաղի հայ ժողովրդի իրավունքների և անվտանգության» մասին հղում ներառելը հակասում է Ադրբեջանի տարածքային ամբողջականությանը և ինքնիշխանությանը, քանի որ պարունակում է մեր տարածքում անջատողականությունը խրախուսելու համար Հայաստանի կողմից նպատակաուղղված կիրառվող եզրույթ:
Միաժամանակ այն հանդիսանում է անհարգալից վերաբերմունք Հայաստանի կողմից իրագործված էթնիկ զտումների և ցեղասպանության քաղաքականության հետևանքով վտարված ադրբեջանցիների նկատմամբ»,- ասվում է Ադրբեջանի ԱԳՆ-ի խոսնակի հայտարարությունում:
Հաջիզադեն նաև պնդում է, որ «Ղարաբաղյան շրջանում ապրող հայերն այդ շրջանի միակ բնակիչները չեն»:
0Comments