Գումարի դիմաց կարճ ժամկետով զինծառայություն անցնելու նախագծի նպատակը աղքատների բանակ ստեղծելը չէ։ Ազգային ժողովում այս հայտարարությունն արեց օրինագծի հեղինակ, «Քաղաքացիական պայմանագիր» խմբակցության պատգամավոր Հայկ Սարգսյանը` պատասխանելով լրագրողների հարցերին։

«Իհարկե աղքատների բանակ չի լինելու, այլ լինելու է հակառակը։ Մեր նախագծի նպատակն այն է, որ ծառայեն բոլորը, նաև միջին խավը և հարուստները», - ասաց նա։

ՔՊ-ական պատգամավորը հավաստիացրեց, որ իր խմբակցությունում տարաձայնություններ չկան օրենքի վերաբերյալ՝ չնայած ընդունման հետաձգումներին։

Փողի դիմաց ծառայության ժամկետը կրճատելու նախագիծը քննադատել են Հայաստանի մարդու իրավունքների պաշտպան Անահիտ Մանասյանը և նախկին ՄԻՊ Արման Թաթոյանը։