Իրանի 7 վարորդի համոզել ենք, իջեցրել ենք իրենց ավտոմեքենաներից

Մանրամասներ
Live24.am-ը ներկայացնում է

1

Մարտի 18-21-ը ընկած ժամանակահատվածում ՀՀ արտակարգ իրավիճակների նախարարության Ճգնաժամային կառավարման ազգային կենտրոնը ճանապարհների արգելափակման դեպքերի վերաբերյալ ստացել է 136 ահազանգ: Դրանց հետևանքով անվտանգ տարածք են տեղափոխվել 520 տրանսպորտային միջոց և 1309 քաղաքացի:

Այս մասին այսօր հրավիրված ասուլիսի ժամանակ ասաց ՀՀ արտակարգ իրավիճակների նախարարության Ճգնաժամային կառավարման ազգային կենտրոնի պետ, փ/ծ գնդապետ Արսեն Մկրտչյանը:

Մկրտչյանը նշեց, որ առատ ձյան պատճառով ավելի շատ ահազանգեր եղել են Սյունիքի մարզում. արգելափակվել է 203 տրանսպորտ, 551 քաղաքացի տեղափոխվել է անվտանգ տարածք: Արագածոտնի մարզում 115 տրանսպորտային միջոց է արգելափակվել և 363 քաղաքացի տեղափոխվել անվտանգ տարածք:

«Շաբաթ օրը՝ մարտի 19-ին, Շտապօգնության ավտոմեքենայի աշխատակիցները Թալինի շրջանի Գառնահովիտ գյուղում մեր փրկարարների օգնությամբ կարողացել են Թալինի բժշկական կենտրոն տեղափոխել 1 տարեկան երեխայի»,- հայտնեց Մկրտչյանը:

Նրա խոսքով՝ Սյունիքի ճանապարհներին արգելափակվել են նաև զբոսաշրջային ավտոբուսներ, որոնց ներսում գտնվող ուղևորներին փրկարարները մեքենաներով տեղափոխել են Կապան քաղաք, Սարավան-Զանգեր ճանապարհից՝ Վայք քաղաք:

«Բեռնատարների վարորդներին համոզել ենք իջնել իրենց ավտոմեքենաներից և մոտակա բնակավայրեր գնալ: Չէին ուզում բեռնատարերը թողնել: Իջեցրել ենք Իրանի 7 քաղաքացու: Ամբողջ գիշեր փրկարարներն իրականացրել են ուղևորների և ավտոմեքենաների դուրս բերման աշխատանքներ»,- ասաց կենտրոնի պետը:

Ըստ նրա՝ առատ տեղումների հետևանքով առաջացած պատահարներն ու խնդիրները կարգավորելու համար հավելյալ ուժերի կարիք կենտրոնը չունի: Նա նաև նշեց, որ այս ամսվա ընթացքում առատ ձյան տեղումները թե՛ ինտեսիվությամբ, թե՛ ինտերվալով տարբեր են մյուս տարիների համեմատ: