Արագածոտնի մարզի Արագածավան գյուղի բնակիչները մի հնարամիտ ակցիա են իրականացրել․ գյուղապետարանի պատին գրատախտակ են ամրացրել, որ եթե գյուղապետի ՔՊ-ական թեկնածու Սուրեն Թորոսյանը, որին համայնքում Փչանի Սուրո են ասում, կարողանա իր անուն-ազգանունը ճիշտ գրել, թող դառնա գյուղապետ։
Բանն այն է, որ համայնքը երկար տարիներ ղեկավարում է Անդրանիկ Պապիկյանը։ Oragir.news-ին հասած տեղեկություններով՝ վերջինիս դեմ իշխանությունները քրեական գործ են հարուցել և ստիպել են աշխատանքից ազատման դիմում գրել։ Պապիկյանը դիմումը գրել է, ինչը և հարուցել է գյուղի բնակչության զայրույթը, բնակիչները եկել են գյուղապետարան, վրդովմունք հայտնել, Պապիկյանն էլ իր գրած դիմումը ճղել ու դեն է նետել, իսկ բնակիչներն էլ նրան փոխարինող թեկնածու ՔՊ-ականի համար հայոց լեզվի այսպիսի յուրահատուկ «քննություն» են նշանակել։
Oragir.news-ը փորձեց խոսել գյուղապետ Անդրանիկ Պապիկյանի հետ, սակայն նրա հեռախոսահամարը անհասանելի էր։ Արագածավանի գյուղապետարանի աշխատակազմի ղեկավարի հետ զրուցեցինք, նա ընդամենն ասաց, որ գրատախտակն արդեն հանվել է, այլ տեղեկություն չտրամադրեց՝ ասելով, որ Ֆեյսբուքում տեսանյութ կա, որտեղ ամեն ինչ երևում է։
Ֆեյսբուքում մենք մեկ այլ տեսանյութ գտանք, որի գլխավոր հերոսը ՔՊ-ական Սուրեն Թորոսյանն է։ Տեսանյութում նա փորձում է ասել, որ Նիկոլ Փաշինյանի անունը պետք է ոսկե տառերով գրվի, սակայն, փաստորեն, ՔՊ-ականի ոչ միայն գրավոր, այլև բանավոր խոսքը լավը չէ։ Նրա այդ արտահայտությունները համեմատել են «Կարգին հաղորդումից» հայտնի դրվագի հետ։
oragir.news
0Comments