Մենք գիտեինք, որ Երևանի քաղաքապետի ընտրությունների հարցում ժողովրդի շրջանում մեծ ապատիա կար, սակայն մասնակցության նման ցածր տոկոս չէինք սպասում. այս մասին ԼուրջCast հաղորդման եթերում ասել է Երևանի նախկին քաղաքապետ Հայկ Մարությանը:
«Ինչքան շատ լիներ մասնակցությունը, այնքան ցածր կլիներ ՔՊ-ի տոկոսը և այնքան բարձր ընդդիմության տոկոսը: Իհարկե, շատ մեծ կարուստ էր մարդկանց քիչ գալը և շատ տարօրինակ էր «Հանրային ձայն» կոչվածի՝ այսինքն՝ «Դոգի» (Վարդան Ղուկասյան-Խմբ.) հավաքած տոկոսը, որովհետև նա սուտ է խոսում: Սա է խնդիրը», - ասել է Մարությանը:
Վերջինս հիշեցրել է, որ Վարդան Ղուկասյանը հանցագործության համար հետախուզման մեջ է: Ըստ Մարությանի՝ խոսքն իրական, այլ ոչ թե «ինչ-որ կարած գործի» մասին է:
«Փաստացի «Հանրային ձայն»-ի ղեկավարը յոթը ձայն ունեցավ ավագանիում և առաջարկում էր՝ էս տվեք, էն տվեք: Բայց մենք արդեն ներսից գիտեինք, որ առնվազն մեկ կամ երկու ձայն նա ի սկզբանե չուներ, ընդ որում, ինքն է խոստովանել դա: Նա ասաց, որ «ես զանգում էի Արտակ Գալստյանին, ասում էի՝ դի՛ր մանդատդ, ինքը չէր դնում»: Իսկ դա նշանակում է, որ իրենք այդ ձայնը չունեն: Ուրիխանյանն էլ այստեղ չէ, չի եկել և չի էլ պատրաստվում գալ: Այսինքն այդ երկու ձայնը չուներ, իսկ հինգ ձայնով ընդհանուր ընդդիմությունը քաղաքապետ չէր կարող ընտրել: Եթե անգամ բոլորը համաձայն լինեն, որ թեկնածուն ես էի, չէր ստացվում դա: Առաջին օրվանից այդ մարդը դա գիտեր և բոլորին, իր ընտրողներին, հանրությանը խաբում էր: Ի վերջո ասաց՝ «ինձ համար միևնույն է՝ ով կլինի» ու ոչ թե տվեցին իրենց ձայները, այլ մասնակցություն ապահովեցին, որ Ավինյանին ընտրեն: Ընդ որում, նա նորից փորձում էր բոլորին մոլորության մեջ գցել՝ ասելով, որ իրենք դեմ են քվեարկել: Իմ կարծիքով՝ ստորություն է հավաքել հարյուր տոկոսանոց ընդդիմադիր ձայներ և դա ուղղակի նվեր տալ իշխանությանը, հետո էլ փորձել դա ցույց տալ որպես դեմ քվերակել... Իսկ թե ինչի համար է տվել ձայները, արդեն կարող ենք կռահել, որովհետև նա հենց այնպես դա չէր անելու», - ասել է Մարությանը:
Ստորություն է հավաքել 100%-անոց ընդդիմադիր ձայներ և ուղղակի նվեր տալ իշխանությանը. Հայկ Մարությանը՝ «Հանրային ձայն»-ի մասին
Մանրամասներ
0Comments