Ուկրաինայի ազգային անվտանգության եւ պաշտպանության խորհրդի քարտուղար Ալեքսեյ Դանիլովը «Ուկրաինական ռադիոյի» եթերում հայտնել է, որ Կիեւն առաջ կտա Ռուսաստանի նախագահ Վլադիմիր Պուտինի նշած ապառազմականացված գոտին «մինչեւ Մոսկվա, Սանկտ Պետերբուրգ», տեղեկացրել է «РБК-Украина»-ն։«Այդ ապառազմականացված գիծն առնվազն կլինի մինչեւ Մոսկվա, Սանկտ Պետերբուրգ, մենք այն անպայման առաջ կտանք։ Միակ տեղը, որտեղ նրանք կարող են կռկռալ, Ուրալի մոտ կլինի։ Հավատացեք, անպայման այդպես կլինի»,- ասել է Դանիլովը։
Նրա խոսքով՝ «ապառազմականացված գոտին կանցնի միանգամայն այլ զուգահեռներով եւ միջօրեականներով», քան կուզենար Ռուսաստանի նախագահը։
«Դա հաստատ կլինի ՌԴ, այլ ոչ թե Ուկրաինայի տարածքը»,- ասել է Դանիլովը։
Ավելի վաղ Ռուսաստանի նախագահը հայտարարել էր, որ ապառազմականացված գիծը պետք է անցնի Ռուսաստանի սահմաններից այն հեռավորության վրա, որը կվնասազերծի երկրի տարածքը գնդակոծություններից։
«(Ճակատի) այդ գիծը պետք է լինի այնպիսին եւ երկրի տարածքից այն հեռավորության վրա, որը կապահովի անվտանգությունը՝ նկատի ունենալով առաջին հերթին օտարերկրյա արտադրության հեռահար զենքը, որն ուկրաինական իշխանությունները կիրառում են խաղաղ քաղաքների գնդակոծման համար»,- ասել է նա։
0Comments