Իլոն Մասկը հայտարարել է, որ դուրս է գալիս Twitter սոցիալական ցանցը գնելու գործարքից։ Գործարքը գնահատվել է 44 մլրդ դոլար։ Ընկերությունը պատրաստվում է դատի տալ Մասկին՝ համաձայնագիրը կյանքի կոչելու համար։
Մասկի փաստաբանների ներկայացրած դատական հայցերում ասվում է, որ ընկերությունը նրան մանրամասներ չի ներկայացրել հարթակում գոյություն ունեցող կեղծ հաշիվների մասին:
Twitter-ի բաժնետոմսերը նվազել են 6%-ով այն լուրերի պատճառով, որ Մասկը դուրս է գալիս գործարքից, որը հայտարարվել էր այս տարվա ապրիլին։
Ընկերության տնօրենների խորհրդի նախագահ Բրետ Թեյլորն արձագանքել է՝ ասելով, որ ընկերությունը նախատեսում է իրավական գործողություններ ձեռնարկել միաձուլման պայմանագիրն ապահովելու համար:
«Twitter-ի տնօրենների խորհուրդը մտադիր է փակել գործարքը պարոն Մասկի հետ համաձայնեցված գնով և պայմաններով և նախատեսում է իրավական քայլեր ձեռնարկել միաձուլման համաձայնագիրը կիրարկելու համար: Մենք վստահ ենք, որ կհաղթենք Դելավերի դատարանում», – գրել է Թեյլորը Twitter-ում:
Մասկի փաստաբանները հայտարարության մեջ նշել են, որ Twitter-ը ձախողել է կամ հրաժարվել է պատասխանել հարթակում կեղծ կամ սպամ հաշիվների մասին տեղեկատվության բազմաթիվ հարցումներին, ինչը հիմնարար է ընկերության բիզնես գործունեության համար:
Փաստաբանները պնդում են, որ Twitter-ը խախտել է գործարքի պայմանները և կեղծ ու ապակողմնորոշիչ հայտարարություններ է արել, որոնց վրա Մասկը հիմնվել է համաձայնագիրը կնքելիս։
Նախկինում Մասկը սպառնացել էր դուրս գալ գործարքից, եթե սոցցանցի ղեկավարությունը չապացուցեր նրան, որ կեղծ և սպամ հաշիվները կազմում են Twitter-ի օգտատերերի 5%-ից ոչ ավելին:
0Comments