Հրապարակվել է «Լավ երկրների» վարկանշային ցանկը (The Good Country Index), որում ընդգրկված է 153 երկիր:
Ինչպես հայտնում է РИА Новости-ն՝ վկայակոչելով վարկանշային ցանկի տվյալները, այն կազմվել է տարբեր չափանիշների հիման վրա՝ հաշվի առնվելով ՄԱԿ-ի, ՅՈւՆԻՍԵՖ-ի, ԱՄՀ-ի և այլ միջազգային կազմակերպությունների տվյալները:
Հիմնական նպատակն է հաշվարկել, թե որքանով է յուրաքանչյուր երկիր նպաստում մարդկության ընդհանուր բարօրությանը՝ ըստ իր չափսերի:
2022-ի վարկանշային ցանկը գլխավորել է Ֆինլանդիան, որը 2021-ի համեմատ բարձրացել է մի քանի կետով: Առաջատար տասնյակում տեղ են գտել նաև Իռլանդիան, Շվեդիան, Գերմանիան, Դանիան, Շվեյցարիան, Նորվեգիան, Ֆրանսիան, Իսպանիան և Կանադան:
Հայաստանը տվյալ աղյուսակում զբաղեցրել է 45-րդ հորիզոնականը: Մեր երկրի ընդհանուր ավանդը գիտության և տեխնոլոգիաների ոլորտում գնահատվել է 52-րդ հորիզոնականին համապատասխան, մշակույթի ոլորտում՝ 90-րդ, կլիմայի՝ 62-րդ, հավասարության և բարգավաճման՝ 14-րդ, առողջապահության՝ 51-րդ: 2021 թվականի աղյուսակում Հայաստանը զբաղեցնում էր 75-րդ հորիզոնականը:
Ինչ վերաբերում է մեր հարևաններին, ապա Վրաստանը 39-րդն է , Թուրքիան`57-րդը, իսկ Ադրբեջանը՝ 108-րդը:
0Comments