Իրանի արտաքին գործերի նախարար Հոսեյն Ամիրաբդոլլահիանը հայտնել է երկրի պատրաստակամությունը՝ մասնակցելու Ադրբեջանի վերահսկողության տակ գտնվող այն տարածքների վերականգնման գործընթացին, որոնք Բաքվին են անցել Լեռնային Ղարաբաղի շուրջ վերջին պատերազմից հետո, հայտնում է Tasnim գործակալությունը:
Իրանցի բարձրաստիճան դիվանագետը կիրակի հանդիպել է Ադրբեջանի փոխվարչապետ, տնտեսական համագործակցության համատեղ հանձնաժողովի նախագահ Շահին Մուստաֆաևի հետ, որը մեկօրյա այցով մեկնել էր Թեհրան։
Երկու պաշտոնյաները քննարկել են կովկասյան տարածաշրջանի վերջին զարգացումները և Թեհրանի և Բաքվի երկկողմ համագործակցությունը։
Արտգործնախարարը վերահաստատել է երկրների տարածքային ամբողջականությանն աջակցելու Իրանի մշտական քաղաքականությունը՝ ընդգծելով, որ միջազգային սահմաններն անփոփոխելի են։
Ադրբեջանի փոխվարչապետն, իր հերթին, գոհունակություն է հայտնել Իրանի նավթի, ինչպես նաև ճանապարհների և քաղաքաշինության նախարարների հետ իր կառուցողական հանդիպումներից՝ ասելով, որ երկու երկրները մոտ են նավթի, գազի ոլորտներում պատմական համաձայնագրերի ստորագրմանը։
0Comments