Մոսկվայում հանդիպել են Ռուսաստանի և Հայաստանի պաշտպանության նախարարները: Պաշտոնական տեղեկատվության մեջ ասվում է քննարկման ընդհանուր թեմաների մասին` երկկողմ համագործակցություն և տարածաշրջանային խնդիրներ:
Նախարարների նախորդ հանդիպմանը`օգոստոսի 11-ին, Սերգեյ Շոյգուն Արշակ Կարապետյանին նվիրել էր դաշույն: Նվերը Կարապետյանին հանձնելով ՝ Շոյգուն ասել էր. «Կարելի է համարել, որ Հայաստանին սպառազինություն մատակարարելու գործընթացը սկսված է»:
Սեպտեմբերի 27-ին Անատոլիական գործակալությանը տված հարցազրույցում Ալիևն ասել էր, որ «երբ մենք իմացանք այս մասին, մենք անմիջապես դիմեցինք ռուսական կողմին և հարցրինք հարցի էության մասին: Տեղեկացանք, որ հայաստանյան մամուլում հրապարակված այս հայտարարությունը (ՌԴ և ՀՀ պաշտպանության նախարարների հանդիպումից հետո) չի համապատասխանում իրականությանը: Պաշտպանության նախարարը (ՌԴ) չի ասել նման բան: Սրանք հայկական քարոզչության կեղտոտ հնարքներն են: Նման հայտարարություն չի եղել: Մենք պաշտոնապես տեղեկացանք նման ծրագրերի բացակայության մասին»:
Ալիևն անդրադարձել էր նաև հայկական բանակին ժամանակակից զենք մատակարարելու խնդրին. «Մենք այդ հարցերով դիմել ենք ռուսական կողմին և ստացել ենք մեզ բավարարող պատասխաններ»։ Նա հավելել էր, որ Ռուսաստանի եւ Ադրբեջանի հարաբերությունները գտնվում են բարձր մակարդակի վրա:
Մոսկվան չի հերքել Ալիևի այդ հայտարարությունները՝ հաստատելով, որ Հայաստանին ժամանակակից զենք մատակարարելը չի մտնում նրա տարածաշրջանային ծրագրերի մեջ: Փոխարենը, Ալիեւը հայտարարեց Ռուսաստանից սպառազինություն գնելու ծրագրերի մասին։
Շոյգու-Կարապետյան երեկվա հանդիպումից հետո սպառազինության մասին խոսք չի եղել:
0Comments