Հայաստանում քննարկվում է սեպտեմբերի 21 -ին Հայաստանի անկախության 30-ամյակի «գունագեղ» տոնակատարություն կազմակերպելու մասին Նիկոլ Փաշինյանի հայտարարությունը: Կարծիքները տրամագծորեն տարբերվում են, բայց մի հարց առայժմ չի քննարկվում՝ կմասնակցի՞ արդյոք Արցախի ղեկավարությունը «գունագեղ տոնակատարությանը»:
Սեպտեմբերի 2-ին Հայաստանի բարձրագույն ղեկավարությունը «քաղաքական որոշում» կայացրեց չմասնակցել Արցախի անկախության օրվա միջոցառմանը: Սա տհաճ ուղերձ դարձավ ինչպես արցախցիների, այնպես էլ Հայաստանում այն քաղաքացիների համար, ովքեր չեն պատկերացնում Հայաստանն առանց Արցախի: Ոչ թե էմոցիոնալ, այլ պրագմատիկ մակարդակում. նոյեմբերի 9-ից հետո ժամանակը ցույց տվեց, թե ինչ է Հայաստանն առանց Արցախի՝ անպաշտպան սահմաններ, ճանապարհների շրջափակում, ներխուժումներ, գերեվարումներ, սպանություններ։ Առանց Արցախի Հայաստանն արյունաքամ է լինում։
Թաքնվելով «քաղաքական որոշման» ետևում ՝ հնարավոր չի լինի լռության մատնել Արցախը: Սեպտեմբերի 21-ին հնարավորություն կա ցուցադրել սեփական իրավունքները և ազգային օրգանիզմի ամբողջականությունը պաշտպանելու պատրաստակամությունը: Հայաստանի անկախության հռչակագիրը հղում է Հայաստանի և Արցախի վերամիավորման մասին Գերագույն խորհրդի 1989 թվականի դեկտեմբերի 1 -ի որոշմանը: Առանց այս որոշման կյանքի կոչման, Հայաստանի անկախությունը թերի է:
Ինչպես թերի է այն, ինչն արվել է այս 30 տարիների ընթացքում: «Վերադարձ դեպի Դիզակ» ՀԿ նախագահ Մարգարիտա Քարամյանն ասում է, որ Հայաստանում ապրող Հադրութի բնակիչներն ունեն Հայաստանի անձնագրեր, սակայն չունեն ՀՀ քաղաքացիություն, ունեն երկու կառավարություն ՝ Ստեփանակերտում և Երևանում, բայց ոչ ոք չի խոսում Հադրութի ազատագրման և քաղաքացիներին իրենց տներ վերադարձնելու մասին:
Ասում են, որ սեպտեմբերի 2 -ին Հայաստանի ղեկավարությանը Մոսկվան ու Բաքուն թույլ չեն տվել մտնել Արցախ: Թույլ կտա՞ն արդյոք Արցախի ղեկավարությանը սեպտեմբերի 21-ին ժամանել Երևան:
0Comments