ՀՀ վարչապետի պաշտոնակատար Նիկոլ Փաշինյանը քիչ առաջ ֆեյսբուքյան ուղիղ եթերում հայտնեց, որ սպառողների համար գազը չի թանկանա:
«Քանի որ տեղյակ եմ, որ գազի գնի շուրջ մամուլում քննարկումներ են տեղի ունենում, և ասվում է, թե ՀՀ սպառողների համար գազը թանկանալու է, ես ուզում եմ երկու բառով ներկայացնել երեկվա իրադարձությունների մասին: Ես երկու անգամ հեռախոսազրույց եմ ունեցել ՌԴ նախագահ Վլադիմիր Պուտինի հետ, և այդ խոսակցությունների թեման եղել է ՀՀ մատակարարվող գազի գինը, և կարելի է ասել՝ եկել ենք լուծման առաջիկա տեսանելի ապագայի համար»,- ասաց նա:
Փաշինյանը նշեց, որ կա երկու օղակ գազի մատակարարման մեջ, մեկը «Գազպրոմ» ռուսական ընկերությունն է և նրանց կողմից «Գազպրոմ Արմենիա» ընկերությանը մատակարարվող գազը, և մյուս օղակը՝ «Գազպրոմ Արմենիայից» հայաստանյան սպառողներին գազի մատակարարումը:
«Ստացվել է այնպես, որ «Գազպրոմ Արմենիա» և «Գազպրոմ» ընկերությունները պետք է վերանայեն գազի մատակարարման գինը, և գնի որոշակի բարձրացում է տեղի ունենալու, բայց ներքին կարգավորումների շնորհիվ հայաստանյան սպառողների համար գազի գնի փոփոխություն տեղի չի ունենալու»,- ասաց նա:
Վարչապետի պաշտոնակատարը նշեց, որ ենթադրում է, որ քննարկումներ են լինելու, թե այս որոշման շնորհիվ մենք որոշակի պարտք ենք կուտակելու և դրա հետևանքով որոշակի ակտիվներ ենք փոխանցելու Ռուսաստանին, և նշեց, որ այդպիսի կարգավորումների մասին խոսք չի գնում:
Ըստ Փաշինյանի՝ ստացվում է, որ առաջին օղակում գնային փոփոխություն տեղի կունենա, իսկ երկրորդ օղակում՝ ոչ:
Փաշինյանը հավելեց, որ ուղևորվում է շնորհավորելու զինվորների Նոր տարին:
Մանրամասները՝ տեսանյութում
0Comments