ԱՄՆ նախագահ Դոնալդ Թրամփը հայտարարել է, որ երեքշաբթի ներում կշնորհի «շատ կարևոր մարդու»՝ չհստակեցնելով, թե ում մասին է խոսքը, գրում է The New York Post-ը։
Թրամփը հայտարարել է, որ երեքշաբթի կստորագրի «չափազանց կարևոր անձի» ներման մասին հրամանագիրը, բայց դա չի լինի ո՛չ ԱՄՆ Ազգային անվտանգության գործակալության նախկին աշխատակից Էդվարդ Սնոուդենը, և ո՛չ էլ նախագահի ազգային անվտանգության հարցերով նախկին խորհրդական Մայքլ Ֆլինը:
Ավելի վաղ Թրամփը հայտնել էր, որ լրջորեն կուսումնասիրի Ազգային անվտանգության գործակալության նախկին աշխատակից Էդվարդ Սնոուդենին ներում շնորհելու հարցը՝ խոստովանելով, որ լավ ծանոթ չէ նրա պատմությանը։
«Ես կուսումնասիրեմ դա: Այդքան էլ Սնոուդենի հետ կապված իրավիճակին ծանոթ չեմ, սակայն մանրամասնորեն կուսումնասիրեմ այն»,- ասել էր նա լրագրողներին:
Ինչպես նշել է Թրամփը, ամերիկյան հասարակությունում Սնոուդենին ներում շնորհելու հարցի շուրջ վերաբերմունքը տարբեր է: Շատերը համոզված են, որ նրա հետ անարդար են վարվել:
Հիշեցնենք, որ Սնոուդենը 2013 թվականին The Washington Post և The Guardian պարբերականներին էր փոխանցել մի շարք գաղտնի նյութեր ԱՄՆ-ի և Մեծ Բրիտանիայի հատուկ ծառայությունների գաղտնալսման ծրագրերի մասին:
0Comments