Լույս օգոստոսի 12-ին ներկայիս Թուրքիայի տարածքում գտնվող Իգդիր քաղաքից 12 կմ հեռավորության վրա տեղի ունեցած երկրաշարժի հետևանքով Իգդիրի շրջանի բնակիչները սկսել են դուրս գալ փողոցներ, նրանցից ոմանք գիշերը լուսացրել են փողոցներում և մեքենաներում: Այս մասին, tert.am-ի փոխանցմամբ, տեղեկացնում է «Հուրրիյեթ» պարբերականը:
Իգդիրի բնակիչ Էրեն Քարագյոզը պատմել է, որ նա քնի մեջ ցնցվել է, երբ եղբայրը նրան արթնացրել է և ասել, որ երկրաշարժ է տեղի ունենում, և նրանք դուրս են եկել փողոց:
Բնակիչներից Մեդին Շըքթաշը պատմել է, որ ցնցումները լուրջ խուճապ են առաջացրել, ինքն ու կինը երկրաշարժից հետո դուրս են եկել փողոց և չեն վերադարձել տուն:
Շրջանի բնակիչներից շատերը գիշերը լուսացրել են փողոցներում, շրջանի փողոցներն այս գիշեր մարդաշատ են եղել:
Օգոստոսի 12-ին՝ տեղական ժամանակով ժամը 03:29-ին (Գրինվիչի ժամանակով՝ ժամը 23:29-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 39.86⁰ և արևելյան երկայնության 44.16⁰ աշխարհագրական կոորդինատներով՝ Թուրքիա, Իգդիր քաղաքից 12 կմ հարավ-արևելք, օջախի 10 կմ խորությամբ, 4.2 մագնիտուդով երկրաշարժ:
Երկրաշարժը զգացվել է ՀՀ Արմավիրի և Արարատի մարզերում՝ 4 բալ, իսկ Երևանում՝ 3-4 բալ ուժգնությամբ։
0Comments