Հայկական կողմից խոցված՝ ադրբեջանական անօդաչու թռչող սարքերը բավական լուրջ ուսումնասիրության աղբյուր են։ Այս մասին այսօր՝ հուլիսի 21-ին, Խանփերյանցի անվան ռազմաավիացիոն համալսարանում խոցված ԱԹՍ-ների ցուցադրության ժամանակ ասաց համալսարանի պետ, գեներալ-մայոր Դանիել Բալայանը։
«Ամբողջը մեր կողմից ուսումնասիրվել է, ուսումնասիրվում է։ Բավական լուրջ ինֆորմացիոն աղբյուր է։ Լուրջ հետազոտությունների նյութ է՝ ինչպես են նրանք կառավարվում, ինչ ծրագրերով են աշխատում, ինչ միջոցներով կարելի է հակազդել, ամեն ինչ։ Ծրագրավորումը իսրայելական արտադրության է, վատ չեն կառավարում, շատ նորմալ կառավարվում են, լուրջ ծրագրավորված զենք է, որ ամբողջովին կարող է կատարել իր խնդիրները ավտոմատ ռեժիմում, դրանք խոցվել են մեր հակաօդային պաշտպանության զորքերի հմտության շնորհիվ»,- նշեց գերենալ-մայորը՝ նշելով, որ հայկական ոչ մի անօդաչու սարք հակառակորդի կողմից չի խոցվել․«Մեր սարքավորներն աշխատել են թե ցերեկային պայմաններում, թե գիշերային պայմաններում եւ իրենց առջեւ դրված խնդիրները կատարել են»։
ՀՕՊ զորքերի շտաբի պետ-վարչության պետի տեղակալ, գնդապետ Գարիկ Մովսիսյանը ներկայացրեց, թե ինչ վնասներ է կրել ադրբեջանական կողմը։
«Մոտավոր հաշվարկներով՝ նվազագույնը 150- 200 մլն դոլարի վնաս է կրել՝ հաշվի առնելով շուկայում առկա տեղեկատվությունը նշված միջոցների գների վերաբերյալ»,- ասաց նա։
0Comments