Անհանգստացնող չէ, դա բնականոն պրոցես է, վարչապետը նման որոշում է կայացրել, շուտով կլինեն հրամանագրերը: Այս մասին լրագրողների հետ զրույցում հայտարարել է ՏԿԵ նախարար Սուրեն Պապիկյանը՝ խոսելով Ոստիկանապետի, ԱԱԾ պետի պաշտոնանկությունների մասին:
Հարցին, ինչով են պայմանավորված որոշումները, Պապիկյանը նշել է, որ պաշտոնանկությունները տարբեր են լինում. «Տվյալ փուլում մեր գործընկերների հետագա պաշտոնավարումը գուցե իրենց ցանկությամբ, գուցե վարչապետի որոշմամբ, այլևս նպատակահարմար չեն: Պատճառները տարբեր են լինում, ես հիմա ոչինչ նշել չեմ ուզում, վարչապետն առաջիկայում ասելիք կունենա, կխոսի մանրամասների մասին»:
Նախարարն ամեն դեպքում նշել է, որ գործողությունները միտված են այդ համակարգերն ավելի արդյունավետ դարձնելուն. «Այլ մանրամասներ, քան արդյունավետությունը բարձրացնելու ցանկությունն է, ես նշել չեմ կարող»:
Նա կոնկրետ դժգոհությունների մասին խոսել չցանկացավ:
Պապիկյանը չի կարծում, թե փոփոխություններն արագ են լինում. «Հիմա մենք խոսում ենք մի որոշման մասին, որի լիազորությունները պատկանում են վարչապետին: Ես խոսեցի այն մասին, ինչի մասին լիազորված եմ խոսել»:
0Comments