Ես անձամբ կկտրեմ իմ ձեռքերը և մի կեղծիք թույլ չեմ տա. Նիկոլ Փաշինյան. ՏԵՍԱՆՅՈՒԹ

«Բոլոր տեսություններն ապացուցել են, որ հնարավոր չէ ունենալ մրցունակ պետություն առանց ինստիտուտների և մեր այս ճանապարհը, որն անցնում ենք, իրականում ինստիտուտների կայացման ճանապարհ է, 2018-ի մայիսին ՀՀ-ում արձանագրվեց ինստիտուտներից կարևորագույնի՝ քաղաքացու հաղթանակը:Այնուհետև մենք շատ արագ փակեցինք ընտրությունների և առհասարակ կեղծիքների ինտիտուտը, հաջորդ փուլում կայացավ Ազգային ժողովը, որովհետև ՀՀ պատմության մեջ մենք երբեք չենք ունեցել, մի բացառությամբ՝ 1999-ի ընտրությունների, երբեք չենք ունեցել ընտրությունների միջոցով կայացած Ազգային ժողով: ԱԺ-ի ամենամեծ գնահատականն այն է, երբ Ադրբեջանում հստակ արձանագրեցին, որ իրենց խորհրդարանն այլևս մրցունակ չէ ՀՀ-ի ԱԺ-ի հետ և հայտարարեցին խորհրդարանական ընտրություններ: Հաջորդ ինստիտուտը, որը կայացավ, Կառավարությունն է, որովհետև ՀՀ ժողովուրդն ընտրեց Կառավարություն և վարչապետ:

Կարծում եմ արդեն եկել է պահը արձանագրելու, թե ինչ է հարկավոր՝ ՀՀ-ն հզոր, կենսունակ ինքնիշխան, լիարժեք պետություն դարձնելու համար, դրա համար մեզ հարկավոր են ինստիտուտներ: Այս մասին այօսր «Այո»-ի շտաբի դրամահավաքի ժամանակ ասաց ՀՀ վարչապետ Նիկոլ Փաշինյանը:

Հիմա հստակ ընդգծել ենք դատական համակարգի փոփոխության ճանապարհը, դատաիրավական փոփոխությունների ռազմավարությունը, որտեղ մանրամասն գծած է, թե ինչպես է կայանալու անկախ դատական համակարգը և ահա եկել է հերթը Սահմանադրական դատարանը որպես ինստիտուտ կայացնելու»,-իր ելույթում ասաց Նիկոլ Փաշինյանը:

«Եվ հարց. այսօր ՀՀ-ում գործող ՍԴ-ն ո՞ւմ է ներկայացնում, ումի՞ց է բխում իշխանությունը, մենք կարող ենք բարձրաձայնել տասնյակ հազարավոր վարկածներ, բայց մի բան հստակ է, այս պահին գործող ՍԴ-ն որևէ իշխանություն՝ չունի ստացած ժողովրդից, և վայելում է ՀՀ ժողովրդի բացարձակ անվստահությունը: Չփոխել այս ինստիտուտը, դա նույնն է, թե հավատալ այն բանին, որ կարելի է ունենալ S դասի «Մերսեդես», երբ նրա վրա տեղադրված է «Մոսկվիչ» 408-ի անվադողներ, ու առաջ գնալ: Մենք այսօր պետք է մեր հայրենիքում իրականացնեն ինստիտուցիոնալ բարեփոխումներ»,-ասաց Փաշինյանը:

Նիկոլ Փաշինյանն ասաց, որ ինքն ու իր թիմն ակտիվ մասնակցելու են քարոզարշավին, լինելու են բոլոր քաղաքներում. «Հանրաքվեում, անկախ արդյունքներից, հաղթելու է ՀՀ անկախ ու հպարտ քաղաքացին, այս քաղաքական թիմը կկտրի իր ձեռքերը, բայց մի քվեաթերթիկի ձեռք չի տա, ես անձամբ կկտրեմ իմ ձեռքերը և մի կեղծիք թույլ չեմ տա, որովհետև դա կնշանակի ջնջել այն արժեքները, որոնց վրա մենք կանգնած ենք»:

Տեսանյութը՝ tert.am-ի