Դատական նիստի ավարտից հետո Սերժ Սարգսյանի պաշտպան Ամրամ Մակինյանը պատասխանեց լրագրողների հարցերին:
Ամրամ Մակինյանը նշեց, որ գործում կան էական բացթողումներ: «Նախաքննական մարմինը պետք է ուշադրություն դարձներ նրան, որ կազմակերպությունը դիզելային վառելիքը գնել է 430 դրամով 100-ավոր տոննաներով և սկսել է վաճառել ավելի էժան՝ 330, 340 դամով: Սրա մասին նախաքննության փուլում ասում ենք վարույթն իրականացնող մարմնին, որ այստեղ պետք են դատահաշվապահական փորձաքննություն անել և մի շարք հանգամանքներ պարզել: Օրինակ՝ այս կազմակերպությունն առնվազն չէր կարող 420 դրամով պետությանը դիզելային վառելիք մատակարարել այն դեպքում, երբ նույն ժամանակահատվածում ձեռք է բերում 440, 460 դրամով: Սա ինչի՞ մասին է խոսում. խոսքը «Մաքսհուր» կազմակերպության մասին է»,- նշեց նա:
Ըստ փաստաբանի պետք էր բազմակողմանի, օբյեկտիվ Քրեադատավարական օրենսգրքի 17 հոդվածի (գործի արդարացի քննությունը) պահանջները պահպանել, հավաքել ոչ միայն մեղադրող ապացույցներ, այլ նաև արդարացնող, ինչպես նաև չխոչընդոտել պաշտպանական կողմին: Նա նշեց, որ բազմաթիվ հարցումներ են արել ՊԵԿ-ին, որտեղից պատասխանել են, որ իրենց հայցած տեղեկությունն առևտրային գաղտնիք է պարունակում: «Տպավորություն է, որ մենք այդ տեղեկությունները պետք է տանենք ու մեր գրասենյակներում օգտագործենք, սակայն մենք կոնկրետ նշում ենք, թե այդ տեղեկություններն ինչ նպատակով են անհրաժեշտ՝ կոնկրետ քրգործով կոնկրետ անձի պաշտպանություն իրականացnելու համար»,- ասաց նա:
Ինչ վերաբերում է նրան, որ դատախազը հերքում է, որ մեկ ցուցմուքնի հիման վրա է մեղադրանք առաջադրվել երրորդ նախագահին, ասաց, որ կզարմանար, որ այդ դատախազն այլ պատասխան տար: «Մենք այդ մասին կխոսենք հաջորդ դատավարության փուլերում: Ես պնդում եմ՝ այդ մեկ ցուցմունքն էլ չկա: Միայն ցուցմունքի փաստացի թղթի կարված լինելը չի նշանակում, որ դա կշիռ ունի»,- նշեց նա:
Դիտարկմանը՝ գյուղատնտեսության նախկին նախարար Սերգո Կարապետյանը, ում ցուցմունքի հիման վրա մեղադրանք է առաջադրվել Սերժ Սարգսյանին, այստեղ էր, Մակինյանը նշեց, որ անուններ չի ցանկանում տալ և Կարապետյանին վերաբերող որևէ հարցի չպատասխանեց:
«Պարոն նախագահն առերես հարցաքննվել է մեկ անգամ իր դեմ ցուցմունք տված անձի հետ: Կհամոզվեք, որ ցուցմունք էլ չկա: Ամեն ապացույց չէ, որ կարող է անցնել Քրեական օրենսգրքի նախատեսված մաղերով և մնա որպես ապացույց»,- ասաց նա։
Ես խոստացել եմ՝ հանրությանը ցույց տալ, թե այս քրեական գործը ինչպես է կառուցվել, ինչ կա քրեական գործում, ինչ աղաղակող փաստեր կան այն մասին, որ պարոն Սարգսյանի նկատմամբ իրականացվում է քրեական հետապնդում, սա ուղղակի զավեշտ է, որ կարող է կոչվել քրեական գործ, այն կարող է դառնալ մեղադրանք, կարող է գալ դատարան, ասաց Սարգսյանի պաշտպան Ամրամ Մակինյանը:
Հարցին՝ քաղաքական ենթատեքստ կա՞, նա պատասխանեց. «Ենթատեքստ չկա, ուղղակի քաղաքական հետապնդում է, և ուղղված է պարոն Սարգսյանի քաղաքական գործունեության համար ինչ-որ զսպման մեխանիզմ գտնելուն»,- ասաց նա և հավելեց. «Մենք հերթականությամբ ներկայացնելու ենք այս քրեական գործի քրեական գործ չլինելը, շինծու ու փուչ լինելը»:
Մանրամասները՝ tert.am-ի տեսանյութում:
0Comments