Ուկրաինայի նախագահ Վլադիմիր Զելենսկին արձագանքել է Իրանի կողմից ուկրաինական ինքնաթիռի խոցման վերաբերյալ խոստովանությանը, հայտնում է korrespondent.net-ը:
«Այսօրվա առավոտը բարի չէր, սակայն ճշմարտություն բերեց: Դեռ մինչ միջազգային հանձնաժողովի աշխատանքների ավարտը, Իրանն ընդունել է ուկրաինական ինքնաթիռի խոցման հարցում մեղքը: Սակայն մենք պնդում ենք մեղքի լիարժեք ընդունման հարցում: Իրանից ակնկալում ենք լիարժեք և թափանցիկ հետաքննություն անցկացնելու պատրաստակամություն, մեղավորների պատասխանատվության ենթարկում, մահացածների մարմինների վերադարձ, փոխհատուցում, դիվանագիտական ալիքներով պաշտոնական ներողություն»,-հայտարարել է նախագահը:
Նա նաև հույս է հայտնել, որ հետաքննությունը հետագայում կանցկացվի առանց արհեստական հետաձգումների և խոչընդոտների:
«Մեր 45 մասնագետները պետք է արդարության հաստատման համար ամբողջական հասանելիություն և փոխգործակցություն ունենան»,- հավելել է Զելենսկին:
Ինչպես ավելի վաղ նշել էր Tert.am-ը, Իրանի նախագահը Twitter սոցիալական կայքի իր էջում հայտնել է, որ «Զինված ուժերի ներքին հետաքննության արդյունքում պարզվել է, որ, ցավոք, մարդկային սխալի պատճառով արձակված հրթիռներն են հանգեցրել ուկրաինական ինքնաթիռի սարսափելի աղետին և 176 անմեղ մարդկանց մահվանը:
«Հետաքննությունը կշարունակվի այս մեծ ողբերգության և աններելի սխալի պատճառների հաստատման նպատակով»,- գրել է նա:
Նախագահը հավելել է, որ «այս աններելի սխալի համար պատասխանատուները պատասխանատվության կենթարկվեն»:
Հիշեցնենք, որ Թեհրանի օդանավակայանից մեկնելուց անմիջապես հետո Կիև թռչող Boeing 737-800 օդանավը լույս հունվարի 8-ին վթարի էր ենթարկվել: Ըստ պաշտոնական տվյալների` վթարի հետևանքով մահացել է 176 մարդ` Իրանի, Ուկրաինայի, Կանադայի, Մեծ Բրիտանիայի, Գերմանիայի, Շվեդիայի և Աֆղանստանի քաղաքացիներ:
0Comments