Հրապարակայնորեն դիմում եմ դատախազությանը՝ պահանջելով քրեական գործ հարուցել Երեւանի քաղաքապետարանում պաշտոնեական լիազորությունների չարաշահման կապակցությամբ: Այս մասին նոյեմբերի 26-ին Երեւանի ավագանու Խորհրդի նիստի ժամանակ հայտարարեց Երեւանի ավագանու «Լույս» խմբակցության ղեկավար Դավիթ Խաժակյանը:
Նա պարզաբանեց, որ Երեւանի քաղաքապետի բացակայության ժամանակ նրա տեղակալ Հայկ Սարգսյանը քաղաքապետի անունից ընդունել է մոտ 70 նորմատիվ ակտեր, ինչն իրավունք չուներ անելու, քանի որ նման որոշումներն ընդունում է հենց քաղաքապետը, կամ, նրա բացակայության ժամանակ՝ քաղաքապետի առաջին տեղակալը: «Դա վտանգավոր միտում է, եւ տվյալ հարցով պետք է զբաղվեն իրավապահ մարմինները»,- նշեց Խաժակյանը:
Երեւանի քաղաքապետի խորհրդական Կարեն Համբարձումյանն ի պատասխան վստահեցրեց, որ օրենքը չի կարգավորում իրավիճակները, երբ տեղում չէ նաեւ քաղաքապետի առաջին տեղակալը: «Քաղաքապետարանը պատրաստ է հիմնավորել նման գործողությունների օրինականությունը, այդ թվում իրավապահ մարմիններին»,- նշեց նա:
Իր հերթին, Երեւանի քաղաքապետ Հայկ Մարությանը հեգնանքով նշեց. «Ազատ երկիր է, ինչ կուզենք, կանենք, եթե դա արգելված չէ»:
0Comments