Աժ աշխատակազմի ղեկավարի նախկին տեղակալ Արսեն Բաբայանի խափանման միջոցն այսօր փոխարինվել է անձնական երաշխավորությամբ:
«Ռեֆորմիստներ» կուսակցության ղեկավար Վահան Բաբայանը, մեկնաբանելով իրադարձությունը, նշել է, որ Արսեն Բաբայանի կալանավորումը հերթական շոուն էր, և պարզ էր, որ նրա խափանման միջոց կալանքը փոխվելու էր:
Բաբայանին կալանավորել էին հոկտեմբերի 24-ին: Հատուկ քննչական ծառայության պաշտոնական հիմնավորման համաձայն` պաշտոնական անձինք, որոնց թվում է նաև Արսեն Բաբայանը, ՀՀ Սահմանադրական դատարանի նախկին նախագահ Գագիկ Հարությունյանի` լիազորությունները վայր դնելու գործընթացում կատարել են պաշտոնեական կեղծիքներ, ինչից հետո ՍԴ նախագահ է դարձել Հրայր Թովմասյանը:
«Հասկացան, որ ՍԴ-ի դեմ պատերազմն ավարտվելու էր անփառունակ պարտությամբ, որովհետև Հրայր Թովմասյանը մնաց անդրդվելի, նա կարողացավ պահպանել պետության հիմնարար ինստիտուտը՝ ՍԴ-ն, և պահպանեց պետականության և Սահմանադրության գոյությունը մեր երկրում: Հարգանքի արժանի քայլ, որը պետք է պատմության մեջ իր գնահատականը ստանա»,- ասել է Վահան Բաբայանը:
«Նրանք հասկացան, որ Արսեն Բաբայանը դարձել է քաղբանտարկյալ, իսկ քաղբանտարկյալների առկայությունը մեր երկրում բերելու է լուրջ խնդիրների միջազգային ասպարեզում»,- ասում է նա:
Ըստ Վահան Բաբայանի՝ իրավական համակարգը հիմա ենթարկվում է մեկ մարդու, բայց այսպես երկար շարունակվել չի կարող:
«Շատ գործեր կարող են փլուզվել, օրինակ, «Մարտի 1»-ի գործը, որը կիսափլուզված վիճակում է, և առհասարակ իրավական դաշտը չի կարող ենթարկվել մի մարդու քմահաճույքներին, որն ուզում է վրեժխնդիր լինել ու իր ծարավը բանեցնել մյուսների վրա, դա չի՛ ստացվելու»,- ասաց Վահան Բաբայանը:
0Comments