ԱՄՆ պետքարտուղար Մայքլ Պոմպեոն Բեռլինում Կայացած մամուլի ասուլիսի ժամանակ՝ պատասխանելով Ուկրաինայի ապագային վերաբերող հարցին, հայտարարել է, թե Միացյալ Նահանգներն աշխատում է Ուկրաինայում խաղաղության հաստատման նախագծի վրա:
Խաղաղության հաստատման հնարավոր նախագծի մասին 168.am-ը խոսեց միջազգայնագետ Սուրեն Սարգսյանի հետ:
«Ուկրաինան գտնվում է Միացյալ Նահանգների ուշադրության կենտրոնում ոչ միայն այս, այլև նախորդ վարչակազմի ժամանակ: Կարելի է ասել, որ հակառակ գործընթաց է սկսվել: Նախորդ վարչակազմը՝ Օբաման, առավել հետաքրքրված էր Ուկրաինայով, քան Թրամփի վարչակազմը»,- ասաց Սարգսյանը՝ վերջին շրջանում Թրամփի վարչակազմի հետաքրքրությունն Ուկրաինայի հանդեպ պայմանավորելով այլ՝ ավելի աղմկահարույց հանգամանքով:
«Խոսքը սկանդալի մասին է, որն ի հայտ է եկել Ուկրաինայի նախագահ Զելենսկու և Միացյալ Նահանգների նախագահ Թրամփի հեռախոսազարույցի արդյունքում: Հեռախոսազրույցի սղագրությունը հետո հայտնվել էր հանրության ուշադրության կենտրոնում: Հենց այս հեռախոսազրույցի պատճառով Թրամփը մեղադրվում է ներքաղաքական գործընթացներում արտաքին ուժերի ներգրավվելու մեջ: Սա հիմք էր հանդիսացել, որ դեմոկրատական կուսակցությունը լուրջ քաղաքական գործընթաց սկսի Թրամփին իմփիչմենթի ենթարկելու համար: Եվ սա թափ առած գործընթաց է, և Միացյալ Նահանգներում այս սկանդալը, որի կենտրոնում, ըստ էության, առանց իր կամքի հայտնվել է նաև Ուկրաինան, ստիպում է, որպեսզի Միացյալ Նահանգներն առավել ակտիվ աշխատանք սկսի տանել ուկրաինական ուղղությամբ»,- ասաց քաղաքագետը՝ հորդորելով իմփիչմենթի գործընթացից մեծ ակնկալիքներ չունենալ:
«Չի կարելի շատ բան ակնկալել այս գործընթացից, որովհետև Սենատում այս պահի դրությամբ մեծամասնություն կազմում են Թրամփի կողմնակիցները և, առանց նրանց քվեարկության, իմփիչմենթն անհնար կլինի: Բայց նրանց քվեարկությունն էլ խիստ կասկածելի է: Առնվազն 25-30 հոգի պետք է Թրամփի թիմից դավաճանեն Թրամփին, որպեսզի իմփիչմենթը տեղի ունենա: Իսկ դա այս պահին, կարծում եմ, շատ քիչ հավանական է»,- ասաց Սարգսյանը:
Վերադառնալով Ուկրաինային՝ փաստենք, որ, բացի սկանդալից, Միացյալ Նահանգների հետաքրքրության շրջանակում շարունակում է մնալ Եվրոպայում կայունության ու խաղաղության հաստատումը: Ուկրաինայի խաղաղության հաստատման նոր նախագիծն էլ այդ հետաքրքրությունների սպասարկման մի միջոց է:
«Կարևոր է նաև այն հանգամանքը, որ ԱՄՆ-ն՝ մանավանդ Թրամփի վարչակազմը, մշտապես մեղադրում է Եվրոպական Միությանը ու անդամ իրենց գործընկերներին ուկրաինական խնդրին ոչ պատշաճ ուշադրություն դարձնելու և աջակցության տրամադրելու համար»,- ասաց Սուրեն Սարգսյանը:
Պետքարտուղար Պոմպեոն Որկրաինայի մասին խոսելիս ներկաներին նաև հիշեցրել էր, որ Միացյալ Նահանգների նախագահ Թրամփը, ուկրաինացիներին «ռուսական ագրեսիայից» պաշտպանել է ոչ թե 1 կամ 2, այլ շատ անգամներ:
«Իրականում ԱՄՆ-ն տարիների ընթացքում լուրջ աջակցություն ցուցաբերել է Ուկրաինային: Մեծ աջակցություն ցուցաբերել է նաև Ուկրաինայի անկախության հռչակումից հետո: Այդ աջակցությունը շարունակական է և շարունակական է լինելու»,- ասաց քաղաքագետը:
2020 թվականին Միացյալ Նահանգներում սպասվում են նախագահական ընտրություններ: ԱՄՆ նախագահի աթոռի պայքարին միացել է նաև Նյու Յորքի նախկին քաղաքապետ, 77-ամյա միլիարդատեր Մայքլ Բլումբերգը, որպես դեմոկրատական կուսակցության թեկնածու:
168.am-ը քաղաքագետից հետաքրքրվեց՝ արդյո՞ք ԱՄՆ-ում վարչակարգի փոփոխությունը կարող է փոփոխել գերտերության արտաքին քաղաքականությունը Ուկրաինայի նկատմամբ:
«Ես չեմ կարող կանխատեսել ադմինիստրացիայի փոփոխություն մեկ տարի անց, բայց, կարծում եմ, որ բոլոր ադմինիստրացիաների ուշադրության կենտրոնում լինելու է ուկրաինական խնդիրը»,- ասաց Սուրեն Սարգսյանը՝ հավելելով, որ Ուկրաինան կարևոր է թե՛ դեմոկրատների, թե՛ հանրապետականների համար:
0Comments