Սա այլանդակ հարձակում էր լրատվամիջոցի դեմ եւ ես պահանջում եմ, որ ՀՀ վարչապետը, ոստիկանապետն արձագանքեն այս միջադեպին: Այս մասին NEWS.am-ի հետ զրույցում ասաց Hayeli.am մամուլի ակումբի ղեկավար Անժելա Թովմասյանը` անդրադառնալով քիչ առաջ մամուլի ակումբի վրա տեղի ունեցած հարձակմանը:
«Սա կոնկրետ հարձակում է իմ անձի դեմ, այս արշավը դեռ շուտվանից էր սկսվել, որն արտահայտվեց հաղորդաշարի փակվելով, սոցցանցերում հահոյախառն մեկնաբանություններով: Ես դիմում եմ ՀՀ վարչապետին, ոստիկանապետին միջազգային հանրությանը եւ պահանջում գնահատական տալ, արձագանքել, քանի որ սա այլանդակ հարձակում է լրատվամիջոցի դեմ: Եթե ես սրա դեմ ընկրկեմ, ապա իրենց առաջնորդը պետք է ձվախեղդ լինի: Ու զավեշտալի է, որ ինձ մեղադրում են հակահայկական քարոզչության մեջ»,- ասաց տիկին Թովմասյանը:
Նա նշեց, որ երկրում չի գտնվում, սակայն իրեն զանգահարել է «Ժուռնալիստների միության» նախագահը, մի շարք իրավապաշտպան կազմակերպություններ եւ ասել, որ միջադեպով զբաղվում են եւ դիմել են ոստիկանություն:
Ավելին վաղ հայտնել էինք, որ հարձակում է տեղի ունեցել Hayeli.am մամուլի ակումբի վրա: 4 երիտասարդներ ձվեր են նետել մամուլի ակումբի ուղղությամբ, նրանցից Դավիթ Հովաննիսյանն ներկայացածն էլ ասաց, որ պահանջում են փակել լրատվամիջոցը:
Նրանց խոսքով` նման ակցիայի պատճառը Hayeli.am կայքով հրապարակված «Ալիևի ուշացած, բայց հուժկու պատասխանը Փաշինյանին» վերտառությամբ հոդվածն է։
0Comments