«Արդեն մեկ տարի է` նախագահ Ռ. Քոչարյանը գտնվում է քաղաքական հետապնդման մեջ և, քանի որ այսօր այլևս Սահմանադրական դատարանը կայացրել է որոշում, համաձայն ՀՀ Սահմանադրության և օրենքների, այս դատարանը նաև կոչված է ի կատար ածել այդ որոշումը»,-ՀՀ երկրորդ նախագահ Ռոբերտ Քոչարյանի աջակիցները «Ազատություն» կոչերով բողոքի ակցիա էին իրականացնում Երևան քաղաքի առաջին ատյանի ընդհանուր իրավասության դատարանի առաջ։
«Մենք խնդրեցինք, որ պարոն Ասլանյանը մեր խնդրանքը, հորդորն ու պահանջը փոխանցի նաև պարոն Արթուր Մկրտչյանին, և մենք ուզում ենք նրա դիրքորոշումը լսել հիմա, թե ինչու Քոչարյանը մինչև հիմա ազատության մեջ չէ։ Աշխատակազմի ղեկավարը մեզ հավաստիացրեց, որ կես ժամվա ընթացքում մեզ տեղյակ կպահի Մկրտչյանի դիրքորոշման, որոշման մասին»,-նշեց Քոչարյանի աջակիցը։
Քոչարյանի աջակիցներին տեղեկացրին, որ երկրորդ նախագահի փաստաբանների կողմից ներկայացված փաստաթուղթը, ՍԴ-ի որոշումը, ըստ կանոնակարգի `Արթուր Մկրտչյանը ուղարկել է Առաջին ատյանի դատավոր Աննա Դանիբեկյանին։
«Այն գործառույթը, որ պետք է իրականացներ պարոն Մկրտչյանը, համաձայն օրենքի, իրականացվել է։ Այժմ մեր խնդիրը Դանիբեկյանին հորդորելն է, հուսով եմ, որ նա հետևում է մեր ակցիային»,-ասաց աջակիցը։
Ակցիայի մասնակիցները որոշեցին 16։00-ին հավաքվել Շենգավիթ վարչական շրջանի ընդհանուր իրավասության դատարանի դիմաց, որտեղ քննվելու է Քոչարյանի խափանման միջոցը։
0Comments