Բանակը որևէ կերպ ընտրական գործընթացներին չի ներգրավվում, ինչպես միշտ՝ աննախադեպ հավասար պայմաններում են բոլոր թեկնածուները գտնվում: Այս մասին Tert.am-ի հետ զրույցում ասաց գնդապետ, Ստեփանակերտի քաղաքապետի թեկնածու Գրիգորի Սահակյանը:
«Ոչ մեկին, ոչ մի ցուցում չի տրվում: Ես՝ լինելով բանակային, ոչ մի առավելություն չունեմ, բացի իմ անցած ճանապարհից: Ընտրություններին բանակի ներգրավվածությունը լինելու է միայն որպես քաղաքացի՝ քաղաքացիական պարտքը կատարելու առումով»,-նշեց նա:
Անդրադառնալով հարցին, թե ինչու է պրոֆեսիոնալ զինվորականը, ով Մարտական խաչ 1-ին աստիճանի մեդալակիր է, որոշել զբաղվել քաղաքականությամբ, Գրիգորի Սահակյանն ասաց, որ բանակում ունեցած 27 տարվա փորձը, հաջողությունները ցանկանում է ներդնել քաղաքի զարգացման գործում:
Նշենք, որ Գրիգորի Սահակյանը ինքնաառաջադրված թեկնածու է, նրան սատարելու մասին հայտարարել են ՀՅԴ և «Սասնա Ծռեր» կուսակցությունները:
«Իմ ծրագրերը ուսումնասիրելուց հետո առաջինը արձագանքեց ՀՅԴ-ն, հրավիրեցին քննարկման, այնուհետև հայտարարեցին սատարելու մասին: «Սասնա Ծռեր»-ը քննարկումներ չեն արել, իրենք ինքնուրույն որոշում են ընդունել. ճիշտն ասած՝ օգնականն է ինձ տեղեկացրել, հետո զանգահարեցի, որոշակի պարզաբանումներ անցկացրեցի, պարզվեց՝ ծրագրերն են ուսումնասիրել, հավանության են արժանացրել»,-մանրամասնեց նա:
Գնդապետը նշեց, որ ընտրությունները աննախադեպ են, թեկնածուների մեծ մասը քաղաքականության մեջ չեն եղել:
Ինչ վերաբերում է ընտրություններին հայաստանյան կազմակերպությունների դիտորդական առաքելություն իրականացնելուն, ապա Գրիգորի Սահակյանն ասաց. «Արցախի թե՛ ԿԸՀ-ն, թե՛ նախագահությունը, թե՛ անդամները ունակ են առանց խախտումների ընտրություններ անցկացնելու: Ընդհանրապես լարվածություն, ճնշում չեմ տեսնում՝ այդ կազմակերպությունները պետք է կատարեն իրենց գործառույթները առանց խանգարելու ընտրական գործընթացներին»:
Հիշեցնենք, որ Ստեփանակերտի քաղաքապետի թեկնածու է առաջադրվել է հինգ թեկնածու, որից չորսը՝ Արեգ Ավագյանը, Արմեն Հակոբյանը, Դավիթ Սարգսյանը և Գրիգորի Սահակյանը ինքնաառաջադրված են: «Ինքնություն և միասնություն» նորաստեղծ կուսակցությունը առաջադրել է Արայիկ Ավանիսյանին:
Մանրամասները՝ տեսանյութում
0Comments