Ինչով կարող է պայմանավորված լինել սրտի հատվածի ցավը

Այս ցավերը կարող են տևել մի քանի րոպեից մինչև մի քանի ժամ կամ անգամ մի քանի օր
սրտի հատվածի ցավ

Սրտի հատվածի ցավն ամենատարածված խնդիրներից մեկն է, որը ծանոթ է գրեթե բոլորին: Նման ցավերը տարատեսակ են լինում՝ ծակող, ճնշող, այրող, մղկտուն և այլն: Դրանք կարող են ի հայտ գալ մի փոքրիկ հատվածում կամ տարածվել ամբողջ կրծքավանդակի, ուսի, թևի, պարանոցի, ստորին ծնոտի, որովայնի կամ թիակի հատվածում:

 

Այս ցավերը կարող են տևել մի քանի րոպեից մինչև մի քանի ժամ կամ անգամ մի քանի օր: Դրանց ինտենսիվությունը կարող է փոխվել անգամ ամենաչնչին շարժումից: Երբեմն դրանք առաջանում են ֆիզիկական ծանրաբեռնվածության հետևանքով, իսկ երբեմն էլ պայմանավորված են լինում որևէ սննդամթերքի ընդունմամբ:

 

Սրտի հատվածի ցավերի պատճառները բազմազան են: Դրանք կարող են պայմանավորված լինել սրտի հիվանդություններով (ստենոկարդիա, սրտամկանի կաթված, բորբոքում և այլն), սակայն հաճախ ցավի պատճառը բնավ սիրտամկանը չի լինում (նևրոզ, կողերի կամ  ողնաշարի միջին հատվածի հիվանդություններ, աղեստամոքսային համակարգի հետ կապված խնդիրներ և այլն):

 

Որոնք են սրտի ցավերի առաջացման պատճառները

 

Սրտի ցավերն, ըստ իրենց ծագման, կարելի է բաժանել երկու խմբի.

 

·        Անգինոզ ցավեր, որոնք առաջանում են իշեմիկ հիվանդության տարբեր փուլերում:

 

·        Կարդիալգիաներ, որոնք պայմանավորված են սրտի բորբոքային հիվանդություններով, բնածին հիվանդութուններով, սրտի արատներով կամ անոթային վեգետատիվ դիստոնիայով:

 

Անգինոզ ցավերն առաջանում են արյան հոսքի բարելավման անհրաժեշտության դեպքում, որը պայմանավորված է լինում ֆիզիկական ծանրաբեռնվածությամբ կամ հուզական լարվածությամբ: Այս ցավից կարելի է արագ ազատվել նիտրոգլիցերինի միջոցով: Իշեմիկ ցավերը սովորաբար լինում են ճնշող ու այրող: Դրանք կարող են տարածվել ամբողջ կրծքավանդակի, ձախ ուսի, թիակի ու ստորին ծնոտի հատվածում և հաճախ ուղեկցվում են հևոցով: Կրծքավանդակի ձախ հատվածում ուժգին, այրող ու ճնշող ցավը սրտամկանի կաթվածի հիմնական ախտանշաններից մեկն է: Ընդ որում՝ այս ցավի դեպքում նիտրոգլիցերինն արդեն չի օգնի:

 

Կարդիալգիաներն առաջանում են սրտի ռևմատիկ հիվանդությունների, միոկարդիտների և սրտի արտաքին թաղանքի բորբոքային հիվանդությունների դեպքում և սովորաբար լինում են երկարատև, ծակող ու մղկտուն: Այս ցավն ուժեղանում է հազալիս կամ շնչելիս: Նման ցավից հնարավոր չէ ազատվել նիտրոգլիցերինի միջոցով, սակայն կարելի է այն մեղմել ցավազրկող դեղամիջոցներով:

 

Շատ հաճախ սրտի ցավը կապված չի լինում սրտամկանի հետ: Եթե ցավի ինտենսիվությունը փոխվում է շարժվելիս կամ շնչելիս, իսկ նիտրոգլիցերինը կամ վալիդոլն անօգուտ են լինում, ապա, ամենայն հավանականությամբ, ցավը պայմանավորված է լինում կրծքային ռադիկուլիտով կամ կողային աճառների հիվանդություններով:

 

Կողոսկրերի հատվածի ուժգին ցավը կարող է լինել գոտեորքինի (опоясывающий лишай) առաջին ախտանշանը, իսկ կարճատև կամ պարբերաբար առաջացող սրտի ցավերը սովորաբար առաջանում են նևրոզի ժամանակ:

 

Սթրեսն ու դեպրեսիան դրսևորվում են պարանոցի և ուսի ցավով: Շատ հաճախ ցավը կապված է լինում միայն մկանների հետ:

 

Հևոցնը և սեղմող ու ծակող ցավերը կարող են պայմանավորված լինել աղիների ուռչածությամբ, որոնք ճնշում են գործադրում սրտամկանի վրա՝ խանգարելով դրա աշխատանքը:

 

Եթե ցավն առաջանում է որևէ սննդամթերք ուտելու կամ ոչինչ չուտելու հետևանքով, ապա պատճառը ստամոքսի կամ ենթաստամոքսային գեղձի հիվանդություններն են: Առհասարակ՝ սրտի ցավերը կարող են պայմանավորված լինել բազմաթիվ այլ խնդիրներով, այդ թվում նաև օստեոխոնդրոզով, ողնաշարի հետ կապված խնդիրներով և այլն:

 

Ինչպես պարզել սրտի ցավի պատճառն ու ինչ անել

 

Ցավի առաջացման պատճառը պարզելու համար հարկավոր է բուժզննում անցնել, որը ներառում է էլեկտրասրտագրություն (ԷՍԳ), սթրես-ԷՍԳ, ձայնասրտագրություն (ֆոնոկարդիոգրաֆիա), էխոսրտագրություն, կորոնարային անգիոգրաֆիա, սրտամկանի սցինտիգրաֆիա, ողնաշարի ռենտգենային հետազոտություն, համակարգչային ու մագնիսա-ռեզոնանսային տոմոգրաֆիա: Երբեմն լինում է նաև նյարդաբանի, օրթոպեդի, գաստրոէնտերոլագի և հոգեբանի խորհրդատվության անհրաժեշտություն:

 

Հարկ է նշել, որ եթե հիվանդը շատ հստակ ու վառ նկարագրում է սրտի հատվածի ցավն ու հաճախ խորհրդակցում բժշկի հետ, ապա ամենայն հավանականությամբ այդ ցավը սրտամկանի հետ կապ չունի: Եթե հիվանդը կարծում է, որ ցավն ամեն անգամ տարբեր տևողություն ու ինտենսիվություն է ունենում և ուղեկցվում է ուժգին սրտխփոցով, ապա մասնագետները վստահ են լինում, որ հիվանդության պատճառը բնավ սրտամկանի հետ կապված խնդիրները չեն:

 

Եթե հիվանդը վատ է նկարագրում ցավը, սակայն հստակ գիտի դրա բնույթը, ապա դա կարող է վկայել սրտի լուրջ հիվանդության մասին: Սակայն, անկախ ցավի առաջացման պատճառից, ցանկացած ախտանշանի դեպքում հարկավոր է անմիջապես դիմել բժշկին:

 

Բուժզննման շնորհիվ սրտաբանը հստակ կախտորոշի հիվանդությունը, ինչը թույլ կտա ճիշտ բուժում նշանակել: Երբեմն խնդրից ազատվելու համար բավական է լինում մանուալ թերապիան, սակայն որոշ դեպքերում կարող է լինել անգամ վիրահատական միջամտության կարիք:

 

Նյութի աղբյուրը՝ medportal.ru, գրում է tert.am: