Ճապոնիայի կայսր Ակիհիտոն երեքշաբթի ավարտել է ծեսերը, որոնք կապված են երեկոյան նշանակված գահից հրաժարվելու հետ, տեսանյութը ցուցադրվել է «Ասահի» հեռուստաալիքի եթերում, փոխանցում է «ՌԻԱ Նովոստի»-ն:
Դարչնագույն հագուստով, որը կարող է կրել միայն միապետը, եւ մետաքսե սեւ գլխարկով Ակիհիտոն դանդաղորեն մտել է կայսերական պալատի տարածքում գտնվող Ամատերասու աստվածուհու պատվին կառուցված սրբավայր, որը համարվում է Ճապոնիայում կայսերական դինաստիայի նախամայրը: Կայսրն այնտեղ հին ճապոներենով կարդացել է հանգստի գնալու մասին «ծանուցումը»:
Ծեսերի շարքը անցկացվել է մարտի 12-ից: Այս ընթացքում կայսրը ճապոնական դիցարանի աստվածություններին եւ իր նախնիների հոգիներին տեղեկացրել է միապետի պարտականությունները վայր դնելու եւ դրանք գահաժառանգ արքայազն Նարուհիտոյին փոխանցելու մասին:
Հեռացող կայսրն այցելել է նաեւ մյուս սրբավայրեր, այդ թվում՝ Ամատերասու աստվածուհու գլխավոր տաճար եւ Տոկիոյում իր հոր՝ կայսր Հիրոհիտոյի դամբարան:
Երեկոյան տեղի կունենա գահից Ակիհիտոյի հրաժարվելու պաշտոնական արարողությունը, իսկ մայիսի 1-ին կսկսվի Նարուհիտոյի կառավարման նոր դարաշրջանը, որը ստացել է Ռեյվա անունը:
0Comments