Թող ժողովրդի մասին մտածեն. Քաղաքացին՝ Քաղաքացու օրվա մասին

^{Այսօր Հայաստանում առաջին անգամ նշվում է Քաղաքացու օրը: Տոնի խորհրդի մասին մեր հարցումները հազիվ գտան պատասխաններ. Քաղաքացիները քչախոս էին. հրաժարվում էին տեսախցիկի առջև հայտնել իրենց կարծիքը։}

^{168.am-ը տեսախցիկից չխուսափող մի քանի համաքաղաքացիներից հետաքրքրվեց, թե որտե՞ղ են նշելու իրենց տոնը։ Պատասխաններից պարզ դարձավ, որ հարցվողներից շատերի համար օրը տոնական չէր, մի քանիսն էլ մեզնից էին տեղեկանում տոնի մասին.}

^{«Ինձ համար կյանքը խորհուրդ չունի, ինչ տոնի խորհուրդ»,- մեր հարցին ի պատասխան նկատում է համաքաղաքացիներից մեկը։}

^{Մեկ ուրիշը՝ «Տոնն ինչպե՞ս եք նշելու» հարցին, այսպես արձագանքեց. «Ամեն ամիս տոն-տոն են սարքում, էսպես ո՞նց կլինի. թող ժողովրդի մասին մտածեն…»։}

^{Դրական կարծիքներ էլ հնչեցին. կային մարդիկ, որոնց տոնն իսկապես ոգևորել էր. «Եթե տանը լինեի, կնշեի: Շատ ուրախ եմ, որ Քաղաքացու օրը նշվեց, որովհետև մինչև հիմա նման բան չէր եղել»։}

^{Տեսախցիկից դուրս՝ մեզ հետ զրույցում հնչում են նաև կոշտ գնահատականներ. «Ի՞նչ տոն է, որ նշեմ… Էս թազա հնարած տոները… Ես հին մարդ եմ, ես հիշում, որ 4 օրից Մայիսի 1-ն է՝ Աշխատավորների օրը, բայց հիմա աշխատավոր ժողովուրդ չի մնացել Հայաստանում, որովհետև աշխատատեղ չկա»։}

^{Տեղեկացնենք, որ ՀՀ վարչապետ Նիկոլ Փաշինյանը ֆեյսբուքյան իր էջում գրառում է կատարել՝ շնորհավորելով ՀՀ քաղաքացիներին քաղաքացու օրվա առթիվ. «Սիրելի ժողովու՜րդ, Հայաստանի Հանրապետության հպարտ քաղաքացիներ. շնորհավորում եմ բոլորիդ Քաղաքացու օրվա առիթով:}

^{Դուք հաղթել եք եւ դուք հաղթելու եք: Դուխով:)»։}

^{Հիշեցնենք՝ մարտի 21-ին կառավարությունը հավանության է արժանացրել «Տոների և հիշատակի օրերի մասին» օրենքում լրացում կատարելու մասին օրենքի նախագծի վերաբերյալ նախաձեռնությունը: Ըստ դրա՝ Հայաստանի Հանրապետության քաղաքացու օրը նշվելու է ապրիլի վերջին շաբաթ օրը: Այն դեպքում, երբ մայիսի 1-ը կհամընկնի շաբաթ օրվա հետ, ապա որպես Հայաստանի Հանրապետության քաղաքացու օր նշվում է ապրիլի վերջին կիրակի օրը: Կառավարությունն օրվա միջոցառումների կազմակերպման համար հատկացրել է 124 միլիոն դրամ:}