«Մատներն էլ հետքը կուտեք». ինչու է Գավառի քյուֆթան ամենալավը

30 տարվա ընթացքում բաղադրատոմսն անփոփոխ է մնացել
Live24.am-ը ներկայացնում է

«Համով Հայաստան» խոհարարական խորագրում Աղասի Բադալյանը պատմել է Հայաստանում ամենահամեղ քյուֆթայի՝ Գավառի քյուֆթայի մասին։ Աղասին այն պատրաստում է 30 տարի և այդ ամբողջ ընթացքում բաղադրատոմսն անփոփոխ է մնացել։

Ավանդական հայկական ճաշատեսակը՝ քյուֆթան, միշտ հայտնի է եղել թե՛ հին ժամանակներում, թե՛ այսօր։ Արտասահմանցիների համար երբեմն բարդ է անվանումը հիշելը, քյուֆթան մի անգամ համտեսելուց հետո նրանք այլևս չեն կարող մոռանալ այն։

Այդ մասին Sputnik Արմենիայի թղթակցի հետ զրույցում ասաց Գավառի քյուֆթայի «արքա», շեֆ խոհարար Աղասի Բադալյանը, որը հայտնի է նաև Սարուխանցի Աղասի մականունով։

«Քյավառի» ընտիր քյուֆթա

«Օգտագործում ենք ընդամենը երեք մթերք՝ միս, աղ և սոխ։ Համեմում ենք հոգու ջերմությամբ և սիրով։ Ահա և ամբողջ գաղտնիքը», - ասաց Բադալյանը։

Sputnik Արմենիայի թղթակիցները ցույց են տալիս՝ ինչպես են քյուֆթա պատրաստում հիմա, ինչպես նաև ինչպիսի տեխնոլոգիայով են ճաշատեսակը պատրաստել հնում։

Սկզբից վերցնում ենք փափուկ միս։ Թակիչով ծեծում մինչև միասեռ զանգված դառնալը։ Ի դեպ, ով չգիտի, ասենք, որ դա շատ բարդ է։ Մի քանի անգամ հարվածելուց հետո ձեռքերը լարվում են, կարող են նաև կոշտուկներ առաջանալ ծանր թակիչի հետ շփումից։

Միսն այնքան ենք ծեծում, մինչև այն դառնա կպչուն։ Ավելացնում ենք աղ և շարունակում ենք ծեծել։ Երբ միսը հասնում է անհրաժեշտ վիճակի, ավելացնում ենք կտրատած սոխ։ Ջրով կաթսան դնում ենք կրակին։ Մսից գնդեր ենք պատրաստում և իջեցնում ջրի մեջ։ Եփում ենք մոտ 40 րոպե։ Պատրաստման ժամանակը կախված է գազօջախի հզորությունից և մսագնդի մեծությունից։

Հանում ենք պատրաստի քյուֆթան, շերտերով կտրտում, վրան կարագ դնում և մատուցում։ Բարի ախորժակ։