Վազգեն Սարգսյանը գիտակցում էր փոխզիջումների սուր անհրաժեշտությունը։ Մեկ այլ հարց՝ նրան թույլ տվեցի՞ն գնալ փոխզիջումների ճանապարհով։ Այսօր Հայաստանում չկա նրա տրամաչափի քաղաքական գործիչ, մենք ժամանակ ենք կորցրել, և այս հարցը վաղուց պետք է լուծված լիներ։ Այս մասին NEWS.am -ի թղթակցի հետ զրույցում ասաց Պաշտպանության և ազգային անվտանգության հարցերի մշտական խորհրդարանական հանձնաժողովի նախագահ, Հայաստանում իշխող «Քաղաքացիական պայմանագիր» կուսակցության պատգամավոր Անդրանիկ Քոչարյանը։
«Ինչո՞ւ 1994 թվականից հետո եղավ այն, ինչ եղավ։ Արդյո՞ք բոլոր իշխանություններն անկեղծ մոտեցել ենիրենց վրա դրված խնդրին։ Ինչո՞ւ այն ժամանակ հարցը չլուծեցին, ընդ որում ՀՀ ԱԳՆ նախկին ղեկավար Օսկանյանն ասում է, որ Փաշինյանը մեծ լեգիտիմություն ունի և կարող է ամեն ինչ լուծել։ Կա՞ն հնարավորություններ իրական փոխզիջումների գնալու։ Կային արդյո՞ք հնարավորություններ իրական փոխզիջումների գնալու Լիսաբոնի գագաթնաժողովից առաջ, և չլուծել իշխանության հարցը՝ պահանջելով Լեւոն Տեր-Պետրոսյանի հրաժարականը»,- ընդգծեց Քոչարյանը։
Նրա գնահատմամբ՝ 1998 թվականին ստեղծված իրավիճակից օգտվեցին Ռոբերտ Քոչարյանը և ղարաբաղյան ծագում ունեցող ուժերը։
«1999-ին Վազգեն Սարգսյանն ու Կարեն Դեմիրճյանը հասկացան, որ այսպես շարունակվել չի կարող։ Այս ուժը, որն ուներ հսկայական լեգիտիմություն, ի վիճակի էր լուծել խաղաղության խնդիրը։ Մենք պարտվեցինք, քանի որ չհասկացանք, թե ինչ է պետականությունը, ինչ է նշանակում լինել մեր երկրի տերը։ 1999 թվականի հոկտեմբերի 27-ին գնդակահարվել են բոլոր նրանք, ովքեր իրենց երկրի նկատմամբ սեփականության զգացում ունեին։ Իսկ առանց առաջնորդների մեր ժողովրդի համար դժվար է իր ճանապարհը գտնել։ 1994 թվականից` գործընթացի մեկնարկից հետո ամբարտավանությունը ոչնչացրեց բանակի ոգին։ Մենք պետք է զարգացնեինք մեր հաջողությունները, և դրա համար պետք էր չթալանել երկիրը։
Այսօր իշխանության դեմ պայքարում են անօրինական ծագման սեփականություն ունեցող ուժերը։ Եթե Սերժ Սարգսյանը պատժեր մեղավորներին, ոչ թե պարգեւատրեր, այդ թվում՝ բանակի հաշվին, այսօր զոհված զինծառայողների մայրերը փողոց դուրս չէին գա։ Նախկին իշխանությունները կարողացել են այնպես հարմարեցնել դատական համակարգը, որ դատավորները կայացնեն իրենց անհրաժեշտ որոշումները»,- հավելեց պատգամավորը։
0Comments