Ռուսական իշխանությունները և զինվորականները թիկունքում ամրություններ են կառուցում, այդ թվում՝ այն տարածքներում, որոնք, ամենայն հավանականությամբ, երբեք չեն դառնա ռազմական գործողությունների վայր, Լրագրի փոխանցմամբ՝ ասվում է Պատերազմի ուսումնասիրության ամերիկյան ինստիտուտի (ISW) ամփոփագրում:
Վերլուծաբանները նշում են, որ, ըստ երևույթին, Բելգորոդի և Կուրսկի շրջաններում պաշտպանական գծերի կառուցումը տեղեկատվական գործողություն է, որի նպատակն է պատկերել Ուկրաինայից դեպի ռուսական տարածքներ եկող սպառնալիքը։
Որպես օրինակ բերվում է Բելգորոդի մարզի նահանգապետ Վյաչեսլավ Գլադկովի հայտարարությունը, ով մարտի 9-ին հայտարարել էր Ուկրաինայի հետ սահմանի երկայնքով «անվտանգության գծի» կառուցման ավարտի մասին։ Նա հայտարարել է, որ ծախսվել է 10 մլրդ ռուբլի (մոտ 132 մլն դոլար)։ ISW-ի վերլուծաբանները կարծում են, որ դա, ամենայն հավանականությամբ, փողի վատնում է, հատկապես Ուկրաինայում ռազմական գործողությունները ֆինանսավորելու Ռուսաստանի կարողության վերաբերյալ հարցերի ֆոնին:
Ուրբաթ օրը օկուպացված Ղրիմի ղեկավար Սերգեյ Ակսյոնովը հայտարարեց ամրացման գծի կառուցման մասին՝ նշելով, որ դա նախագահ Վլադիմիր Պուտինի հրամանն է։ Ղրիմում ամրությունները կառուցվում են առաջնագծից մեծ հեռավորության վրա, և դրանում ներգրավված են մարդիկ, ովքեր կարող են լուծել ավելի հրատապ մարտական առաջադրանքներ։
Դա կարող է վկայել այն մասին, որ Մոսկվան վստահ չէ, որ կկարողանա երկար ժամանակ պահել Ուկրաինայի հարավի օկուպացված տարածքները, նշում է ISW-ն։
0Comments