Ձմեռային չոր եղանակը մտավախություններ է առաջացրել, որ Իտալիան կարող է բախվել ևս մեկ երաշտի: Ըստ գիտնականների և բնապահպանական խմբերի՝ Ալպերում ձյան տեղումները նորմայից 50 %-ով պակաս են եղել:
Միևնույն ժամանակ Վենետիկում, որտեղ սովորաբար գլխավոր մտահոգությունը հեղեղումներն են, այժմ ջրի մակարդակն իջել է. հայտնի ջրանցքներից մի քանիսում անհնար է դարձել գոնդոլաների, ջրային տաքսիների և արտակարգ ծառայությունների նավակների տեղաշարժը: Այս մասին տեղեկացնում է «Արմենպրես»-ը՝ վկայակոչելով Reuters գործակալությանը:
Legambiente բնապահպանական կազմակերպությունը հայտնել է, որ գետերն ու լճերը ջրի խիստ պակաս ունեն: Իտալիայի ամենաերկար Պո գետի ջուրը նորմայից 61 %-ով պակաս է տարվա այս եղանակի համար: Իսկ հյուսիսային Իտալիայում գտնվող Գարդա լճի ջրի մակարդակն իջել է ռեկորդային ցածր մակարդակի. լճի վրա գտնվող Սան Բիաջիո կղզի կարելի է հասնել բացված արահետով:
Ըստ Ազգային հետազոտական կենտրոնի փորձագետ Մասիմիլիանո Պասկիի՝ հիդրոբալանսը վերականգնելու համար հարկավոր են առնվազն 50 օր տեղումներ:
2022 թ. հուլիսին Իտալիան արտակարգ դրություն էր հայտարարել Պո գետին հարող շրջաններում՝ 70 տարվա ընթացքում վատթարագույն երաշտի պատճառով:
0Comments