Ուկրաինայի նախագահի գրասենյակի ղեկավարի խորհրդական Միխայիլ Պոդոլյակն ասել է, որ մոտ ապագայում պետք է սպասել նոր պայթյուններ Ռուսաստանի սահմանամերձ շրջաններում վառելիքի ու քսանյութերի պահեստներում և բազաներում, փոխանցում է Լրագիրը։
Պոդոլյակը մեկնաբանել է հաղորդագրությունները, որ չորեքշաբթի գիշերը Ռուսաստանի միանգամից երեք շրջաններում՝ Բելգորոդի, Կուրսկի և Վորոնեժի շրջաններում, որոտացել են պայթյուններ, այդ թվում՝ զինամթերքի պահեստում։
Կիևը չի ընդունում իր մասնակցությունը ռուսական վառելիքի, գիտական և ռազմական օբյեկտներում վերջերս տեղի ունեցած պայթյուններին և հրդեհներին, սակայն ուկրաինացի պաշտոնյաներն ակտիվորեն մեկնաբանում են դրանք, տեղեկացնում է BBC-ն։
«Ռազմական գործողությունների ինտենսիվությունը շատ բարձր է։ Իհարկե, հակամարտության նման ինտենսիվությունը ճշգրիտ կարտացոլվի Ռուսաստանի Դաշնության սահմանամերձ շրջաններում», – ասել է Պոդոլյակը։ «Այնտեղ խուճապային տրամադրություններն արագորեն կաճեն, այնտեղ կհայտնվեն կոնֆլիկտային իրավիճակներ, այնտեղ պահեստներ կպայթեն, և դա միայն ավելի կխորանա»։
«Եվ ապառազմականացման ինտենսիվությունը, ենթադրենք, շատ լավ անուն է, Ռուսաստանի Դաշնության ապառազմականացման, հատկապես սահմանամերձ շրջաններում, իմ կարծիքով, առաջիկա շաբաթների ընթացքում միայն էապես կաճի»,- ասել է նախագահի խորհրդականը։
0Comments