Հայկական ԶԼՄ-ները գրում են, որ Հայաստան դաշինքը կրկին կառաջարկի արտաքին հարաբերությունների խորհրդարանական հանձնաժողովի անվան մեջ ավելացնել «և Արցախի հարցերով», իսկ խորհրդարանական մեծամասնությունը կրկին կմերժի այդ առաջարկը:
Սա միանգամայն հավանական է. խորհրդարանի ներկայիս կազմը կոչված է Արցախը վերածել արտաքին հարաբերությունների շարքային խնդրի՝ այն ամբողջությամբ մոռացության տալու հեռանկարով: Եթե ընդդիմությունը կոչ է անում ոչ թե ճանաչել Արցախը որպես Հայաստանի մաս, այլ ստեղծել հանձնաժողով, ապա գործող իշխանությունը «պողպատե մանդատ» ունի՝ վերջնականապես փակելու Արցախի էջը Հայաստանի նոր պատմության մեջ:
Սեպտեմբերի 7-ին Երևանում տեղի է ունեցել հանդիպում Հայաստանի և Արցախի արտաքին գործերի նախարարներ Արարատ Միրզոյանի և Դավիթ Բաբայանի միջև: Հանդիպումից հետո Դավիթ Բաբայանն ասել է. «Ընդգծվել է, որ Արցախը չի կարող լինել Ադրբեջանի կազմում»: Նա նշել է, որ Ադրբեջանը, ամենայն հավանականությամբ, տորպեդահարելու է Մինսկի խմբի աշխատանքի վերսկսումը: Միևնույն ժամանակ, Բաբայանը գովաբանել է Արցախում ռուսական խաղաղապահ զորախմբի հրամանատար, գեներալ Մուրադովին:
Ինչպե՞ս են Հայաստանը և Արցախը մտադիր «վերսկսել բանակցությունները» Մինսկի խմբի հովանու ներքո, եթե ճանաչում են «եռակողմ հայտարարությունները»: Երեւանն ու Ստեփանակերտը չեն խոսում Մինսկի խմբի աշխատանքները տորպեդահարելու հարցում Ռուսաստանի դերի մասին, չնայած այդ կապակցությամբ ՌԴ առաջին դեմքերի հայտարարություններին: Նրանք չեն խոսում նաև այն մասին, թե ով թույլ չի տալիս հայ պաշտոնյաներին մուտք գործել Արցախ:
Չնայած այն հանգամանքին, որ ԱՄՆ-ն, Ֆրանսիան, Մեծ Բրիտանիան Հայաստանի արտաքին գործերի նախարարին ուղղված իրենց ուղերձներում խոսում են Մինսկի գործընթացին աջակցելու մասին, Երևանը համառորեն հեռանում է բանակցություններից:
Մինչև սեպտեմբերի 2-ը Արցախի խորհրդարանի նախագահ Արթուր Թովմասյանը մի քանի օր շարունակ խորհրդակցություններ է անցկացրել Երևանում՝ փորձելով, ինչպես գրել են լրատվամիջոցները, համոզել ՀՀ իշխանություններին ներկա գտնվել Արցախի անկախության 30-ամյակին նվիրված միջոցառումներին: Բայց Ստեփանակերտ ժամանեցին պատգամավորներ, իսկ գործադիր իշխանությունից ոչ ոք չկար:
Այս պայմաններում Ստեփանակերտին մնում է ընդամենը մեկ քայլ՝ հրավիրել Արցախի խորհրդարանի նիստ և կրկին դիմել Հայաստանին՝ Արցախը Հայաստանի միացնելու պահանջով։ Սեպտեմբերի 27-ը «ամենահարմար» օրն է:
0Comments