Գորբաչովը հայտնել է, թե որն է Լուկաշենկոյի սխալը

ԽՍՀՄ նախկին նախագահ Միխայիլ Գորբաչովը կարծում է, որ Բելառուսի նախագահ Ալեքսանդր Լուկաշենկոյի սխալն այն է, որ նա ուշացումով է աջակցության խնդրանքով դիմել աշխատավորներին, գրում է kp.ru կայքը։ 

«Լուկաշենկոն օգնության համար արտադրական ձեռնարկությունների աշխատակիցներին էր դիմել, բայց, կարծես, ուշացումով»,- հարցազրույցի ժամանակ հայտարարել է նա և հավելել, որ ԽՍՀՄ-ի գոյության վերջին շրջանում նա նույնպես դիմել է աշխատավորներին։ 

«Անհրաժեշտ աջակցությունը չեղավ։ Մեղադրել աշխատողներին ես ունակ չեմ»,- խոստովանել է նա։ 

Նախկին առաջնորդի խոսքով՝ Բելառուսում տեղի ունեցող իրադարձություններն արտերկրից ազդեցության հետևանք են։ 

Գորբաչովը հարցազրույցի ժամանակ խոսել է նաև ԽՍՀՄ փլուզման մասին և նշել, որ թողել է Խորհրդային Միության նախագահի պաշտոնը, որպեսզի «խուսափի պառակտումից ու ներքին պատերազմից»։

Բելառուսում օգոստոսի 9-ին կայացած նախագահական ընտրություններից ի վեր շարունակվում են բողոքի ակցիաները, որոնց մասնակիցներն իրենց դժգոհությունն են հայտնում ընտրությունների արդյունքներից, որոնց համաձայն՝ 80 տոկոս ձայնով հաղթող է ճանաչվել գործող նախագահ Ալեքսանդր Լուկաշենկոն, իսկ ընդդիմադիր թեկնածու Սվետլանա Տիխանովսկայան ձայների ընդամենը 10,12 տոկոսն է հավաքել։